Minenierha prapracuje pytańnie pastavak bienzinu ź Biełarusi, daviedaŭsia «Kommiersant». U apošnija hady impart paliva ź Biełarusi rezka źniziŭsia, ale z hetaha hoda jano pastaŭlajecca tranzitam u rasijskija party dla pieravałki na ekspart.
Minenierha i MZS RF pavinny da 15 krasavika prapracavać pytańnie ab pastaŭkach bienzinu ź Biełarusi. Pra heta sa spasyłkaj na pratakoł narady vice-premjera Alaksandra Novaka z kiraŭnictvam naftavych kampanij paviedamiŭ «Kommiersant».
U Minenierha skazali vydańniu, što «štohod pierad viasnovymi ramontami NPZ i pieryjadam rostu popytu prapracoŭvajuć usie mahčymyja kanały atrymańnia i raźmierkavańnia aŭtamabilnaha bienzinu». U viedamstvie dadali, što va ŭmovach, kali ceny ŭ Rasii strymlivajucca za košt dempfiera, pastaŭki aŭtamabilnaha bienzinu biełaruskich NPZ u Rasiju ekanamična nieefiektyŭnyja ŭ paraŭnańni z ekspartam za miežy JEAES. Pry hetym, adznačyli ŭ Minenierha, bałans vytvorčaści i spažyvańnia paliva ŭ Rasii zališni, i biełaruski pradukt nie budzie nieabchodny.
U Sakrataryjacie Novaka admovilisia ad kamientaroŭ vydańniu.
Biełaruskaje paliva histaryčna pastaŭlałasia ŭ zachodnija rehijony Rasii, adnak u apošnija niekalki hadoŭ impart rezka ŭpaŭ ci navat abnuliŭsia, pakolki dla biełaruskich vytvorcaŭ prodaž u Paŭnočna-Zachodniuju Jeŭropu i na Ukrainu bolš vyhadny. Vyklučeńniem staŭ 2020 hod, kali Rasii na fonie pandemii daviałosia ŭvieści zabaronu na impart naftapraduktaŭ, jaki dziejničaŭ da 1 kastryčnika 2020 hoda. Embarha pavinna było pieraškadžać traplańniu bolš tannaha — pierš za ŭsio biełaruskaha — paliva ŭ krainu ŭ toj čas, jak u RF z-za pandemii nazirałasia źnižeńnie popytu.
Ciapier Rasija nie impartuje paliva ź Biełarusi, ale z hetaha hoda jano ŭ davoli bujnych abjomach pastaŭlajecca tranzitam u party na rasijskaj Bałtycy dla pieravałki na ekspart. Pastaŭki byli pieraaryjentavanyja z partoŭ krain Bałtyi, što stała adkazam na sankcyi, uviedzienyja paśla vybaraŭ 2020-ha.
