Biełaruskaja hramada ŭ Sankt-Pieciahburhu z dnia ŭ dzień niekalki miesiacaŭ zapar ładziła pikiety ŭ padtrymku biełarusaŭ
U Sankt-Pieciarburhu palicyja zatrymała hramadzianina Biełarusi Paŭła Štańko adrazu paśla zakančeńnia terminu jaho aryštu, paviedamlaje «Novaja hazieta».
Mužčynu pavieźli ŭ pastarunak, kab skłaści pratakoł za parušeńnie režymu znachodžańnia ŭ Rasii. Paŭła zatrymali, kali jon vyjšaŭ sa śpiecpryjomnika paśla piaci sutak aryštu za arhanizacyju niesankcyjanavanaha mierapryjemstva, udakładniajuć pravaabaroncy.
U niadzielu ŭ Sankt-Pieciarburhu palicyja taksama zatrymała aryštavanuju raniej hramadzianku Biełarusi Žannu Halejevu —dziaŭčyna pavinna była vyjści sa śpiecpryjomnika 28 sakavika ŭ 11: 40, ale da zakančeńnia terminu jaje aryštu pa aktyvistku znoŭ pryjšli siłaviki.
Na Halejevu skłali jašče adzin pratakoł pa č. 2 st. 20 KaAP RF — arhanizacyja abo praviadzieńnie publičnaha mierapryjemstva biez apaviaščeńnia. Pavodle źviestak palicyi, 27 lutaha Halejeva praviała pikiet na Lihaŭskim praśpiekcie — akcyja była nakiravanaja suprać supracoŭnictva narviežskaj kampanii Yara z vytvorcam minieralnych uhnajeńniaŭ «Biełaruśkalijem».
Pieršy raz sud aryštavaŭ Paŭła Štańko i Žannu Halejevu 25 sakavika. Razam ź imi taksama byli aryštavanyja hramadzianie Biełarusi Jahor Miakińnikaŭ, Julija Štańko i Uładzimir Drahun. Usich piaciarych pryznali vinavatymi ŭ parušeńni vyznačanaha paradku arhanizacyi albo praviadzieńnia mitynhu z-za zdymki videa ŭ studzieni.
Na zapisie aktyvisty śpiavajuć pieśniu, a pamiž kupletami adna aktyvistka pramaŭlaje ŭ padtrymku hramadzian Biełarusi i kaža: «Svabodu Navalnamu!»
Niekalki tysiač biełarusaŭ Piciera roznymi sposabami padtrymlivali pratesty suprać falsifikacyi vybaraŭ, nasilla i biezzakońnia ŭ Biełarusi.
