Fota Depositphotos.com
Šviecyju časta nazyvajuć jeŭrapiejskaj Kramianiovaj dalinaj, a Stakholm staŭ adnym z najbolš papularnych haradoŭ dla startapaŭ u śviecie.
Pośpiech krainy adlustroŭvajecca ŭ štohadovym śpisie najbolš paśpiachovych jeŭrapiejskich kampanij ad FT-Statista pa vynikach rostu za 2016—2019 hady. Stakholm trapiŭ u top-10 haradoŭ pa kolkaści kampanij, jakija trapili ŭ hety rejtynh. Ahułam u śpisie znachodziacca 13 šviedskich kampanij, piša The Financial Times.
Usiaho ŭ Stakholmie naličvajecca 7 startapaŭ, košt jakich pieravyšaje $1 miljard. Choć heta i mienš, čym u Paryžy, Bierlinie abo Łondanie, u Stakholmie takich startapaŭ na dušu nasielnictva bolš, čym u lubym inšym jeŭrapiejskim horadzie.
Jašče niekalki hadoŭ tamu šviedski IT-siektar byŭ dastatkova kropkavym, ale zdoleŭ abjadnacca, a razam z hetym pavialičyłasia kolkaść inviestaraŭ. U Šviecyi isnuje pryjaznaja prafiesijnaja supolnaść, jakaja dazvalaje abmieńvacca vopytam i idejami.
Oskar Bierhłund, vykanaŭčy dyrektar stakholmskaj płaciežnaj kampanii Trustly, adznačaje, što takija paśpiachovyja kampanii, jak Spotify i Klarna, natchniajuć nastupnaje pakaleńnie. «Uzbahačajecca ŭsia biznes-ekasistema. Viedy, vopyt i kapitał całkam dastupnyja, što dazvalaje raźvivacca novym idejam», — adznačaje pradprymalnik.
Jašče adzin sakret pośpiechu — palityka šviedskaha ŭrada ŭ 1990-ch hadach. Tady ŭłady pačali masava vydavać subsidyi, kab prostyja hramadzianie mahli kupić piersanalnyja kampjutary. Bolš za toje, urad šmat inviestavaŭ u vysakachutkasny šyrokapałosny internet, jaki praviali skroź, navat u vioski.
Nichto tady nie moh ujavić, što hetyja inviestycyi ŭ kamfort dla ludziej stanuć taksama šturškom da pieratvareńnia Stakholma ŭ IT-stalicu Skandynavii. Vysokaja kampjutarnaja hramatnaść siarod nasielnictva, raźvitaja sietkavaja infrastruktura, a jašče i demakratyčnaja kultura biznesu paspryjali chutkamu raźvićciu startapaŭ.
Siebaśćian Siemiantkoŭski, dyrektar kampanii Klarna, zhadvaje, jak jaho niebahataja siamja zmahła dziakujučy dziaržaŭnym subsidyjam nabyć kampjutar. Tady Siebaśćian šmat času prasiedžvaŭ za ekranam. A ŭžo ŭ 2005 hodzie z univiersiteckimi siabrami zasnavaŭ Klarna — kampaniju, jakaja dazvalaje ažyćciaŭlać finansavyja pasłuhi ŭ Internecie paśla pakupki.
Unutrany rynak Šviecyi davoli nievialiki, usiaho 10 miljonaŭ čałaviek z kapiejkami, tamu pradprymalniki pieravažna aryjentujucca na ekspart. Pieršyja paśpiachovyja technałahičnyja kampanii, naprykład, Skype, płaciežnaja kampanija iZettle, raspracoŭščyki hulniaŭ King Digital i Mojang, byli pradadzienyja bahaciejšym amierykanskim kankurentam Microsoft i PayPal. Heta było adnym z vyrašeńniem prablem finansavańnia startapaŭ u Stakholmie.
Adnak apošnija hady prablem z hrašyma niama — paśla taho, jak kampanii nakštałt Spotify i Klarna pačali pryciahvać uvahu z usiaho śvietu. U vyniku mižnarodnyja vienčurnyja kampanii ciapier aktyŭna inviestujuć u šviedskija startapy, što dazvalaje im chutka vychodzić za miežy dziaržavy.
