Ilustracyjnaje fota Nadziei Bužan
«Na minułym tydni ofis Śviatłany Cichanoŭskaj prapanavaŭ ludziam prahałasavać za pieramovy apazicyi z režymam Łukašenki pry mižnarodnym pasiarednictvie i pošuk płatformy dla praviadzieńnia vybaraŭ u hetym, a nie ŭ 2022 hodzie. ZŠA padtrymlivajuć hetuju inicyjatyvu», — zajaviła pasoł ZŠA ŭ Biełarusi Džuli Fišer na forumie Kastusia Kalinoŭskaha ŭ Vilni ŭ paniadziełak. Jaho tranślacyja viałasia ŭ YouTube, piša Interfaks.
Pasoł Jeŭrasajuza ŭ Biełarusi Dzirk Šubiel taksama zajaviŭ ab padtrymcy inicyjatyvy. Pieramovy, ličyć jon, «pavinny pryvieści da svabodnych demakratyčnych vybaraŭ sioleta, jak Džuli (Fišer) skazała — nie paźniej. I z šyrokim mižnarodnym nazirańniem», — skazaŭ jon.
Akramia taho, na forumie Kalinoŭskaha pakazali videazvarot kiraŭnika dypłamatyi ES Žazepa Barela.
«My hatovyja ŭvieści bolš sankcyj, piersanalnych i ŭ dačynieńni da struktur, adkaznych za falsifikacyju vybaraŭ i parušeńnie pravoŭ čałavieka. My hatovyja ŭvieści bolš sankcyj u vypadku adsutnaści jakich-niebudź palapšeńniaŭ», — adznačyŭ jon.
Pa słovach Barela, ES pravioŭ poŭnuju reviziju adnosin ź Biełaruśsiu, spyniŭ palityčnyja kantakty i pramoje finansavańnie uładaŭ.
U toj ža čas kiraŭnik jeŭrapiejskaj dypłamatyi zajaviŭ, što «sapraŭdny inkluziŭny dyjałoh — heta adziny šlach dla zabieśpiačeńnia mirnaha ŭrehulavańnia ciapierašniaha kryzisu». «I my hatovyja padtrymać hety praces», — zapeŭniŭ Barel.
