Na razhlad u sud nakiravanaja kryminalnaja sprava ŭ dačynieńni da 30-hadovaj minčanki, jakuju abvinavačvajuć u zabojstvie muža, raspaviali karespandentu ahienctva «Minsk-Naviny» ŭ prakuratury Kastryčnickaha rajona horada Minska.
Adnosiny pamiž mužam i žonkaj na praciahu niekalkich hadoŭ byli vielmi naciahnutymi. Šlub jany nie skasoŭvali tolki tamu, što stajali ŭ čarzie na budaŭnictva žylla jak šmatdzietnaja siamja — vychoŭvali traich niepaŭnaletnich dziaciej, małodšamu ź jakich usiaho čatyry hady.
U toj złapomny dzień, 31 śniežnia 2020 hoda, muž z žonkaj znoŭ pasvarylisia. Haspadar adpraviŭsia adznačać nastupleńnie śviata da pryjacielaŭ, jakija žyli ź imi ŭ adnym padjeździe, a da jaho žonki zajšoŭ susied, ź jakim jany trochi vypili, paśla čaho toj syšoŭ. Žančyna zamoviła picu i ježu z restarana chutkaha charčavańnia. Novy hod siamiejnaja para ŭsio ž vyrašyła adznačać razam, zaprasiŭšy da siabie ŭ hości znajomaha, jaki byŭ biazdomnym i časta načavaŭ u ich paradnaj.
Čarhovaja svarka pamiž mužam i žonkaj uspychnuła z-za kavałka picy, jaki mužčyna mieŭ namier źjeści jašče da pačatku zastolla.
Słoŭnaja svarka z uzajemnymi abrazami pierarasła ŭ bojku: razharačany śpirtnym muž daŭ žančynie aplavuchu, a taja ŭ adkaz z usioj siły jaho šturchnuła. Hość nieadnarazova sprabavaŭ ich supakoić, ale biespaśpiachova. U niejki momant žančyna schapiła na kuchni haspadarčy nož i z krykam «Na!» udaryła muža ŭ hrudnuju kletku.
Uśviadomiŭšy, što narabiła, jana stała bicca ŭ isterycy, prasić u muža prabačeńnia. Na kryk z pakoja vyzirnuli spałochanyja dzieci, pryjšli susiedzi. Na žal, vyratavać mužčynu miedykam nie ŭdałosia: ranieńnie akazałasia śmiarotnym.
— Abvinavačanaja raniej da kryminalnaj adkaznaści nie pryciahvałasia, pracavała pradaŭcom u pryvatnaj kampanii, — raspavioŭ namieśnik prakurora Kastryčnickaha rajona Jaŭhien Maciušenka. — U dačynieńni da hramadzianki raspačataja kryminalnaja sprava pavodle č. 1 art. 139 KK Respubliki Biełaruś («Zabojstva»), sankcyja jakoj praduhledžvaje pakarańnie ŭ vyhladzie pazbaŭleńnia voli na termin ad 6 da 15 hadoŭ.
