Adna z hałoŭnych mahčymych źmien — pierahlad štataŭ biudžetnych arhanizacyj. Praściej kažučy, havorka pra aptymizacyju kolkaści rabotnikaŭ. Kiraŭnik Minfina ŭ artykule časopisa «Finansy. Ulik. Aŭdyt» raspavioŭ, jakija źmieny varta čakać biudžetnikam, piša Tut.by.
Ministr finansaŭ Juryj Sielivierstaŭ adznačaje, što «va ŭmovach ściskańnia resursnaj bazy biudžetu, pavieličeńnia vydatkaŭ na absłuhoŭvańnie pazyk, a taksama padtrymku realnaha siektara ekanomiki i bankaŭskaj sistemy na pieršy płan vychodzić zadača pošuki ŭnutranych reziervaŭ dla naroščvańnia sacyjalnych vydatkaŭ».
Pavodle jaho słoŭ, na pavyšeńnie ŭzroŭniu apłaty pracy ŭ biudžetnaj śfiery pry vychadzie na paramietry prahramy sacyjalna-ekanamičnaha raźvićcia na 2021—2025 hady spatrebicca, pavodle acenak, 7,2 miljarda rubloŭ u hod, abo bolš za 3% da VUP.
Nahadajem, čynoŭniki abiacajuć u hetaj piacihodcy asobnym katehoryjam biudžetnikaŭ padniać u 1,5—2 razy zarobak. Heta nastaŭniki, vykładčyki, daktary i siaredni miedpiersanał, rabotniki śfiery sacyjalnaha absłuhoŭvańnia, kultury.
Pavyšać zarobki buduć za košt aptymizacyi štatu
Pavyšeńnie zarpłaty ŭ biudžetnaj śfiery budzie zabiaśpiečvacca siarod inšaha za košt aptymizacyi struktury i kolkaści rabotnikaŭ, pra heta havorycca ŭ Prahramie sacyjalna-ekanamičnaha raźvićcia na hetuju piacihodku. Heta moža vyklikać dadatkovaje napružańnie ŭ śfiery, asabliva ŭ rehijonach, dzie prablematyčna znajści novaje pracoŭnaje miesca. Inšyja mahčymaści pavieličeńnia zarobkaŭ biudžetnikaŭ, jakija ahučyli čynoŭniki, — paetapnaje pavieličeńnie bazavaj staŭki i raźvićcio pazabiudžetnaj dziejnaści.
Juryj Sielivierstaŭ u svaim artykule kaža pra «transfarmacyju sistemy» i kaža, što «šukać resursy (na pavyšeńnie zarobkaŭ) pryjdziecca ŭ tym liku i za košt unutryhalinovaj aptymizacyi». «Jak vynik vymušanaha pracesu, novaje abličča nabudzie ŭsia sistema biudžetnych arhanizacyj, — piša ministr. — Biudžetnamu siektaru pryjdziecca sychodzić ad statyčnaha stanu, refarmujučysia paralelna sa źmienaj ekanamičnaj situacyi».
Kiraŭnik Minfina pryvodzić «dastatkova pazityŭny prykład» - stvareńnie ŭ 2020 hodzie centraŭ pa zabieśpiačeńni dziejnaści biudžetnych arhanizacyj. «Uparadkavańnie narmatyvaŭ kolkaści rabotnikaŭ, zaniatych zabieśpiačeńniem finansava-haspadarčaj dziejnaści takich ustanoŭ u rehijonach, dazvoliła skaracić štatnuju kolkaść ich supracoŭnikaŭ na 1,2 tysiačy adzinak i na hetaj asnovie pavysić uzrovień apłaty pracy zaniatych».
Jak piša Juryj Sielivierstaŭ, z ulikam užo napracavanaha vopytu ŭ siarednieterminovym pieryjadzie spatrebicca dalejšy pierahlad štataŭ biudžetnych arhanizacyj.
Ministr raspavioŭ pra ŭkaranieńnie c 1 studzienia 2023 hoda miechanizmu miedycynskaj akredytacyi arhanizacyj achovy zdaroŭja. «Biudžetnaje finansavańnie na ich utrymańnie budzie vydatkoŭvacca pry ŭmovie adpaviednaści pradstaŭlanych pasłuh bazavym (etałonnym) patrabavańniam akazańnia miedycynskaj dapamohi nasielnictvu», — udakładniŭ kiraŭnik Minfina.
«Stymulavańnie rublom — samy efiektyŭny instrumient aptymizacyi vydatkaŭ»
Pavodle jaho słoŭ, jašče adzin viektar aptymizacyi vydatkaŭ — uparadkavańnie sietki biudžetnych arhanizacyj. «U kožnym halinovym Ministerstvie treba vypracavać «darožnuju kartu» mier pa raźvićci «ekanamičnych» formaŭ absłuhoŭvańnia nasielnictva (niestacyjanarnych, mabilnych, mižrehijanalnych), — piša Juryj Sielivierstaŭ. — Paralelna metazhodna praciahvać ukaranieńnie narmatyŭnaha finansavańnia najbolš biudžetajomistych sacyjalnych halin. Usim vidavočna, što stymulavańnie rublom — samy efiektyŭny instrumient aptymizacyi vydatkaŭ u siektary».
Na dumku ministra, «nie abjomy finansavańnia pavinny adpaviadać sietcy biudžetnych ustanoŭ, a, naadvarot, štaty, kolkaść arhanizacyj, vydatki na ich madernizacyju i raźvićcio — padładžvacca pad isnujučyja mahčymaści».
«Na pieršy płan vyjdzie toje, jak arhanizacyja realizuje svajo dziaržaŭnaje pryznačeńnie, nakolki ludzi zadavolenyja jakaściu atrymanych pasłuh, a nie pamier składzienaha ŭstanovaj kaštarysu. Dadzieny tezis tyčycca i sistemy žyllova-kamunalnaj haspadarki», — adznačaje Juryj Sielivierstaŭ.
Pra «kantraloraŭ» i pravierki dziaržpradpryjemstvaŭ (a nie tolki biudžetnikaŭ)
Ministr finansaŭ ličyć, što «naśpieła ŭzmacnieńnie sistemy kantrolu, skiravanaj na apieratyŭnuju likvidacyju i praduchileńnie parušeńniaŭ».
«Va ŭmovach praviedzienaj aptymizacyi efiektyŭna spravicca z hetymi vyklikami siłami tolki «kantraloraŭ», vidavočna, nie ŭdasca. Tamu staŭku łahična zrabić na sistemu tak zvanaha ŭnutranaha kantrolu i aŭdytu», — piša Juryj Sielivierstaŭ.
Jon raspavioŭ pra piłotny prajekt u centry zabieśpiačeńnia dziejnaści biudžetnych arhanizacyj Słuckaha rajona. «Funkcyja ŭnutranaha aŭdytu ŭ pieryjad jaho praviadzieńnia była ŭskładziena na asobnych rabotnikaŭ centra — jak dadatkovaja da asnoŭnaj pracy. Praviedzienyja kantrolna-analityčnyja mierapryjemstvy dazvolili vyjavić šerah niedachopaŭ, źviazanych jak z afarmleńniem buchhałtarskich dakumientaŭ, tak i z praviadzieńniem invientaryzacyi, śpisańniem techniki i inšymi pytańniami», — adznačaje Juryj Sielivierstaŭ.
Jon ličyć, što adpracavaŭšy sistemu ŭnutranaha kantrolu ŭ centrach, paśla hetaha «metazhodna razhledzieć stvareńnie słužbaŭ unutranaha kantrolu i aŭdytu ŭ bujnych biudžetnych arhanizacyjach, a taksama pradpryjemstvach realnaha siektara ekanomiki, ułaśnikam jakich źjaŭlajecca dziaržava». Heta značyć, u hetym vypadku havorka ŭžo idzie nie tolki pra biudžetnyja arhanizacyi, ale i ŭ cełym pra dziaržaŭnyja pradpryjemstvy.
Što ciapier adbyvajecca z zarobkami biudžetnikaŭ
Pavodle źviestak Biełstata, siaredni zarobak biudžetnikaŭ u studzieni źniziŭsia na 101 rubiel u paraŭnańni ź śniežniem 2020-ha — da 1099. rubloŭ (źviestki za luty jašče nie apublikavanyja). Heta sumy da vypłaty padatkaŭ, heta značyć na ruki vychodzić mienš. Pry hetym taksama realnyja zarobki, jakija raźličvajucca z papraŭkaj na rost cenaŭ na tavary i pasłuhi, taksama ŭpali — bolš jak na 9 rubloŭ.
U 2020 hodzie biudžetnikam płanavali padniać zarpłaty da 80% ad siaredniaj zarpłaty pa krainie. Na hety pakaźnik pa vynikach minułaha hoda ŭdałosia vyjści, suadnosiny skłali 80,4% (za studzień-śniežań minułaha hoda). Adnak tut jość niuans: vyjści na hety ŭzrovień šmat u čym atrymałasia za košt nadbavak miedykam za baraćbu z karanavirusam.
Na jakija zarobki šukajuć miedykaŭ i nastaŭnikaŭ
U ahulnarespublikanskim banku vakansij ciapier značycca 2956 prapanoŭ dla daktaroŭ-śpiecyjalistaŭ. Pry hetym 1289 prapanoŭ ad najmalnikaŭ z zarobkam da 700 rubloŭ. Bolš za 1000 rubloŭ abiacajuć pa 703 vakansijach.
Jak praviła, zarobki ŭ vakansijach pakazvajuć da vypłaty padatkaŭ. Heta značyć na ruki vyjdzie mienš.
Dla nastaŭnikaŭ u banku raźmieščana 193 vakansii. Bolšaść ź ich (128 prapanoŭ) — na zarobak da 600 rubloŭ.
