Fota Depositphotos.com
Vyniki daśledavańnia byli apublikavanyja ŭ amierykanskim navukovym časopisie Proceedings of the National Academy of Sciences (PNAS).
Uzrovień pyłku ŭ pavietry ličycca pavyšanym, kali kolkaść pyłkovych ziarniat pieravyšaje 250 na kubičny mietr pavietra na praciahu niekalkich dzion. Daśledčyki zaŭvažyli, što čym bolš stanaviłasia pyłku, tym chutčej pavyšaŭsia ŭzrovień zaražeńnia.
Navukoŭcy atrymali źviestki ad 130 stancyj pyłkovaha manitorynhu z 31 krainy za pieryjad sa studzienia da krasavika 2020 hoda. Hetyja źviestki paraŭnali z kolkaściu vypadkaŭ zachvorvańnia padčas pieršaj chvali. U daśledavańni ŭličvalisia takija faktary, jak ščylnaść nasielnictva i ŭviadzieńnie karancinu ŭ krainach, paviedamlaje DW.
Z 31 krainy, bolšaść ź jakich znachodziacca ŭ Jeŭropie, u 14 znajšli suviaź pamiž vysokim uzroŭniem pyłku i infiekcyjami kavidu. U astatnich krainach uzrovień pyłku byŭ nie takim vysokim, kab vyvučać jaho upłyŭ na karanavirus.
U vyniku daśledčyki vyjavili, što pyłok moža pavialičvać raspaŭsiudžvańnie infiekcyi na 20%, a ŭ sukupnaści ź inšymi faktarami navakolnaha asiarodździa, takimi jak temperatura pavietra i vilhotnaść, heta ličba pavialičvajecca.
Zhodna z daśledavańniem, biez karancinu dadatkovyja 100 pyłkovych ziarniat na kubičny mietr pavialičvajuć uzrovień zaražeńnia na 4%.
Heta značyć, što na raspaŭsiudžvańnie kavidu ŭpłyvajuć nie tolki asabistyja faktary, ale i ŭmovy navakolnaha asiarodździa.
Tamu aŭtary daśledavańnia rajać padčas siezona vialikaj kolkaści pyłku nasić maski dla filtracyi čaścic, asabliva tym, chto znachodzicca ŭ hrupie ryzyki.
Kali virusy traplajuć u arhanizm razam z pyłkovymi ziarniatami, pyłok parušaje imunny adkaz, što dazvalaje virusam chutčej raspaŭsiudžvacca ŭ arhaniźmie. Navukoŭcy miarkujuć, što toje ž samaje moža adbyvacca i z karanavirusam.
