Ježy Hryhienča 18 studzienia 2021 hoda z 11.27 da 11.29 pryniaŭ udzieł u pikietavańni ŭ budynku suda Lidskaha rajona, skazana ŭ pastanovie suda ad 4 sakavika.
Administracyjnuju spravu zaviali paśla vyniasieńnia prysudu aktyvistu ź Biarozaŭki Vitoldu Ašurku ŭ sudzie Lidskaha rajona 18 studzienia. Tady padtrymać Ašurka sabralisia kala 50 čałaviek. Prysud — piać hadoŭ kałonii — sustreli krykami «Hańba!».
Ježy nie pryznaŭ vinu. Pa słovach aktyvista, jon pikiet nie pravodziŭ, łozunhaŭ nie vykrykvaŭ. Sudździa vyrašyła, što vinu Hryhienčy dakazvaje videa z suda i pakazańni śviedki-milicyjanta. «…Paśla abviaščeńnia prysudu nie pakinuŭ zału sudovych pasiadžeńniaŭ, a znachodziŭsia siarod hrupy hramadzian, jakija skandujuć łozunhi». Hetym, na dumku suda, Ježy parušyŭ č. 3 art. 23.34 KaAP — Parušeńnie paradku arhanizacyi abo praviadzieńnia masavych mierapryjemstvaŭ (z 1 sakavika 2021 hoda — st. 24.23 KaAP — Hrodna.life).
Sam Ježy na sud nie źjaviŭsia — pastanova suda jamu pryjšło poštaj 12 sakavika. Raniej, kali jon 10 lutaha pryjechaŭ u Lidu pa poźvie, jaho zatrymali na 72 hadziny da suda, ale sudzić nie stali. Pa tym ža padziejam na 50 bazavych vieličyniaŭ aštrafavali žurnalista Juryja Dziašuka. Razam z žurnalistam pa hetaj spravie prachodziać jašče kala 10 čałaviek, jakija prysutničali na sudzie nad Vitoldam Ašurkam.