U Biełarusi ŭ lutym ceny na tavary i płatnyja pasłuhi vyraśli na 1,9%, vynikaje sa źviestak Biełstata. U apošni raz miesiačnaja inflacyja była vyšejšaj u lutym 2016 hoda — 2,9%. Pry hetym hadavaja inflacyja ŭ minułym miesiacy razahnałasia da 8,7%, piša Tut.by.
Niecharčovyja tavary ŭ lutym padaraželi na 1,1%, charčovyja — na 1,8%, a płatnyja pasłuhi — na 3,4%. U hadavym vyražeńni rost skłaŭ 9,4%, 7,8% i 9,2% adpaviedna.
Ź lutaha vyraśli roźničnyja ceny na leki, miedvyraby, dziciačyja tavary, niekatoryja pradukty charčavańnia. Heta źviazana z pavyšeńniem z 1 studzienia PDV, da lutaha roźničnyja ceny treba było abnavić z ulikam novaha pamieru padatku. U studzieni taksama pavysili taryfy na žyllova-kamunalnyja pasłuhi. Ale z-za niuansaŭ statystyki heta padaražańnie adbiłasia ŭ danych za luty.
U cełym hadavaja inflacyja ŭ minułym miesiacy skłała 7,7% (luty da lutaha). U studzieni hadavy pryrost cen na tavary i pasłuhi byŭ na ŭzroŭni 7,7%. U Nacbanku tłumačyli paskareńnie rostu cen šmat u čym pavyšeńniem PDV na mnohija pradukty, dziciačyja tavary, leki i miedvyraby. U studzieni taksama padniali taryfy na žyllova-kamunalnyja pasłuhi, ceny na cyharety, staŭki akcyzaŭ na ałkahol, pavysili canu aŭtamabilnaha paliva.
Jaki prahnoz pa cenach na 2021 hod
Adna z zadač na 2021 hod, jakuju pastaviŭ urad, — žorstka kantralavać ceny, impart. U Saŭminie zapeŭnivajuć, što majuć namier rabić heta «ekanamičnymi mietadami, nie zabaronnymi». Hadavaja inflacyja na sacyjalna značnyja tavary na 2021-y ŭ prahramie sacyjalna-ekanamičnaha raźvićcia na 2021 hod zapłanavanaja na ŭzroŭni 4,9% (śniežań da śniežnia). Premjer-ministr Raman Hałoŭčanka raniej zajaŭlaŭ, što ŭ cełym prahnoz pa inflacyi na 2021-y — 5% (śniežań da śniežnia). Prahramaj asnoŭnych napramkaŭ hrašova-kredytnaj palityki na 2021 hod taksama zapłanavana inflacyja ŭ 5%.
Pieradumoŭ, kab upisacca ŭ 2021 hodzie pa hadavoj inflacyi ŭ 5%, vobmal. U tym liku z-za niepradkazalnaści pandemii, niestabilnaj sacyjalna-ekanamičnaj i hramadska-palityčnaj situacyi ŭ krainie. Tym bolš što z pačatku hoda padniali PDV na leki, miedvyraby, charčovyja i dziciačyja tavary, što adbiłasia na cenach u roźnicy.
Nahadajem, u 2020 hodzie tavary i płatnyja pasłuhi padaraželi na 7,4% (śniežań da śniežnia), vynikaje z danych Biełstata. Heta rekordny pakazčyk za apošnija 4 hady. Pry hetym čynoŭniki prahnazavali na 2020-y hadavuju inflacyju, nie bolšuju za 5%.
