Fota Depositphotos.com
Daśledčyki daŭno cikaviacca rehienieratyŭnymi zdolnaściami žyvioł. Naprykład, niekatoryja reptylii mohuć skidvać svaje kancaviny dla samazachavańnia, a paśla adnaŭlać stračanyja častki cieła. Hety praces viadomy jak aŭtatomija. Niekatoryja navukoŭcy spadziajucca, što razhadka bijałahičnaha miechanizmu, jaki lažyć u asnovie takich rehienieratyŭnych zdolnaściaŭ, niekali znojdzie miedycynskaje prymianieńnie siarod ludziej.
A niadaŭna navukoŭcy vyjavili niezvyčajny prykład rehienieracyi. U artykule, apublikavanym u časopisie Current Biology, paviedamlajecca pra dva vidy marskich ślimakoŭ, jakija mohuć zhubić usio cieła, a paśla adraścić novaje.
Hety vid ślimakoŭ nazyvajecca Elysia marginata. Za piaćciu ślimakami hetaha vidu nazirali bijołahi ź Japonii. Jany byli šakavanyja, kali istoty raptam adkinuli svaje cieły, a paśla pačali adroščvać ich nanova. Razam ź ciełam ślimaki adkidvajuć serca, nyrki, kišačnik i repraduktyŭnyja orhany.
Daśledčyki miarkujuć, što rehienieracyja źjaŭlajecca adkazam ślimakoŭ na parazitarnyja infiekcyi, piša The Economist.
Adkinutyja cieły praciahvali varušycca na praciahu niekalkich dzion. Paśla serca spyniałasia, a tkanki pačynali raskładacca.
Hałovy ślimakoŭ, u svaju čarhu, pačynali poŭzać i chapać vodaraści rotam. Pakolki stravavańnie ślimakoŭ było ŭskładnienym praz adsutnaść orhanaŭ, istoty źbirali chłarapłasty z vodaraściaŭ, jakija traplali ŭ reštku tkanak. Vierahodna, što pažyŭnyja rečyvy, jakija stvarajuć chłarapłasty, zabiaśpiečvajuć ślimakam zdolnaść adnaŭlać svaje cieły.
Bijołahi vyjavili, što ślimaki hublajuć zdolnaść da rehienieracyi z uzrostam. Tym istotam, jakim było ad 226 da 336 dzion, ź lohkaściu adnaŭlali svajo cieła za 20 dzion. U ślimakoŭ, starejšych za 480 dzion, rehienieracyi nie adbyvałasia ŭvohule, a hałovy pamirali praz 10 dzion paśla adździaleńnia ad cieła.
