spring96.org
Ivan Dacyšyn całkam pryznaŭ vinu. Jon raspavioŭ, što ŭ noč z 11 na 12 žniŭnia sapraŭdy znachodziŭsia na praśpiekcie Dziaržynskaha kala parku Paŭłava. Jany ź siabrami ŭbačyli, što kala skulptury zubra stajać ludzi i vyrašyli padyści da ich. Ale jany nie paśpieli hetaha zrabić: da prypynku padjechaŭ aŭtobus, adkul pačali vybiahać supracoŭniki orhanaŭ unutranych spraŭ, ludzi pačali raźbiahacca.
Praź niekatory čas Ivan viarnuŭsia na hetaje miesca: ludzi, katoryja nazirali za zatrymańniami, kidali kamieńnie ŭ aŭtobus i supracoŭnikaŭ. Chłopiec taksama sprabavaŭ dapamahčy i praduchilić zatrymańni: kali aŭtobus ź ludźmi pačaŭ ruchacca, jon uziaŭ kamień i kinuŭ u bok transpartu. Jon nie bačyŭ, ci trapiŭ jon kudy-niebudź praz drenny zrok.
Ale Ivan padkreślivaje, što jon kinuŭ tolki adzin kamień, bo chacieŭ, kab milicyja syšła i nie zatrymlivała ludziej.
Što kažuć paciarpiełyja?
U spravie dva paciarpiełyja: Illa Šalik i Uładzisłaŭ Dubkoŭ.
Jany raspaviali, što ŭ toj viečar jany jeździli pa Minsku i spynialisia ŭ kropkach masavaha skopišča ludziej. Kala parku Paŭłava bolšaść ludziej źbiehła, astatnija «pakazvali nieprystojnyja žesty». Adzin čałaviek z natoŭpu byŭ nastrojeny ahresiŭna, trymaŭ u ruce niejki pradmiet. Ź im jon sa śpiny padyšoŭ da supracoŭnikaŭ. Šalik padyšoŭ da jaho, kab jon nie napadaŭ na jaho kaleh, zatym adčuŭ udar źleva pa padbarodździ. Ubačyŭšy heta, kalehi pryjšli na dapamohu, pačali zatrymlivać ludziej. U hety momant u supracoŭnikaŭ palacieła kamieńnie, jany syjšli ŭ aŭtobus. U vyniku incydentu ŭ Šalika dyjahnastavali pierałom zuba vierchniaj skivicy, u Dubkova — pierałom palca: jon taksama nie bačyŭ, chto kidaŭ kamieńnie, jakoje, mierkavana, i trapiła jamu ŭ nahu.
Chłopiec, jakoha sprabavali zatrymać, byŭ vysoki i mocny, nie padobny da abvinavačanaha. Ivan Dacyšyn nie byŭ zatrymany, škło ŭ aŭtobusie było vybita paśla taho, jak začynilisia dźviery. Heta paćvierdzili abodva paciarpiełyja.
Abodva paciarpiełyja nie majuć pretenzij da abvinavačanaha, vybačeńni prymajuć.
Pazoŭ vystaviŭ i «Minsktrans»: škodu ŭ 340 rubloŭ i 84 kapiejki za raźbity aŭtobus užo vypłacili.
Razhlad spravy praciahniecca 17 sakavika ŭ 10:30.
