Fota Depositphotos.com
Technałohii raspaznavańnia emocyj, jakija mohuć adsočvać hnieŭ, sum, ščaście, markotu ci inšyja bijamietryčnyja źviestki, vyznačajuć pačućci čałavieka praz ruchi muskułaŭ tvaru, ton hołasu, ruchi cieła i inšyja pakazalniki. Heta bolš składanyja sistemy, čym technałohija raspaznavańnia tvaru, jakaja prosta vyznačaje supadzieńni abličča z fota.
Jak i dla technałohij raspaznavańnia tvaraŭ, sistemy raspaznavańnia emocyj uklučajuć u siabie zbor vialikaj kolkaści asabistaj infarmacyi, patrebnaj dla adsočvańnia i stvareńnia profilu čałavieka.
Mašyna vučycca vyjaŭlać suviaź pamiž emocyjaj i jaje źniešnim prajaŭleńniem na asnovie papiarednich praanalizavanych źviestak. Hetyja źviestki ŭklučajuć u siabie videazapisy telepieradač, intervju, śpiektakli, filmy i dyjałohi, razyhranyja prafiesijnymi akciorami. Zatym technałohija vykarystoŭvaje analiz hetych materyjałaŭ, kab vyznačyć emocyju čałavieka pa vyražeńni tvaru i inšych pakazalnikach.
U Kitai hetaja śfiera kvitnieje. Z 2012 hoda viadomyja publičnyja asoby krainy, u tym liku jaje kiraŭnik Si Czińpin, padkreślivali nieabchodnaść «pazityŭnaj enierhii». Dla ich heta častka ideałahičnaj kampanii pa sadziejničańni adnym vyrazam tvaru i abmiežavańni inšych, paviedamlaje The Guardian.
Krytyki technałohii kažuć pra toje, što jana zasnavanaja na psieŭdanavukovych stereatypach. Usio bolš navukoŭcaŭ, jurystaŭ i pravaabaroncaŭ ličać, što technałohija raspaznavańnia emocyj maje surjoznyja nastupstvy dla pravoŭ čałavieka, abarony pryvatnaści i svabody vyražeńnia.
Naprykład, sistemy raspaznavańnia zvyčajna zasnavanyja na tym, što akciory demanstrujuć tuju ci inšuju emocyju tak, jak jany jaje ŭjaŭlajuć, a nie na realnych prykładach demanstracyi emocyj. Da taho ž, vyrazy tvaru mohuć mocna adroźnivacca ŭ pradstaŭnikoŭ roznych kultur, tamu ich raspaznavańnie moža pryvieści da stvareńnia novych stereatypaŭ i mahčymaj dyskryminacyi.
Tym nie mienš, industryja raspaznavańnia emocyj ciapier bujna raźvivajecca, tamu pravaabaroncy kažuć, što zmahacca z technałohijaj treba jak maha chutčej.
Kampanija Taigusys jakraz śpiecyjalizujecca na hetaj technałohii. Jaje sistemy ŭstanoŭlenyja prykładna ŭ 300 turemnych ustanovach va ŭsim Kitai, abjadnoŭvajuć 60 tysiač kamier. Pa słovach hienieralnaha mieniedžara kampanii Čeń Veja, raspaznavańnie emocyj dapamoža pradkazać niebiaśpiečnyja pavodziny z boku źniavolenych i vyśviatlać patencyjnych złačyncaŭ.
Pa mierkavańni Čeń Veja, kali źniavolenyja viedajuć, što znachodziacca pad nazirańniem takoj sistemy ŭvieś čas, to jany stanoviacca bolš pasłuchmianymi. Taksama sistema moža vyznačyć, kali źniavoleny maje psichičnyja razłady i źbirajecca skončyć žyćcio samahubstvam.
Taksama sistema vykarystoŭvajecca dla manitorynhu nastaŭnikaŭ i vučniaŭ u škołach, piersanału ŭ kampanijach. Da taho ž, takija technałohii prymianiajucca ŭ handlovych centrach i na aŭtastajankach.
Budzie sens ad vykarystańnia technałohii i ŭ inšych śfierach žyćcia: možna budzie vyśviatlać, jakim vučniam ciažka asvojvać školnuju prahramu, a taksama znachodzić siarod pažyłych ludziej u internatach tych, chto chvareje na demiencyju.
Čeń Vej pierakanany, što technałohii raspaznavańnia tvaru mohuć dapamahčy praduchilić niaščasnyja vypadki. U prykład jon pryvodzić incydent u pravincyi Huansi, kali achoŭnik dziciačaha sadka letaś nakinuŭsia z nažom na dziaciej.
Adnak pravaabaroncy ličać, što padobnyja technałohii majuć mała suviazi ź biaśpiekaj, ale niepasredna źviazanyja z uzmacnieńniem cenzury i zapałochvańniem.
