U pryvatnaści, ułady ZŠA paspryjali tamu, kab farmaceŭtyčnaja kampanija Merck & Co. dapamahła kampanii Johnson & Johnson z vytvorčaściu jaje adnakampanientnaj vakcyny. Tonkaść u tym, što Merck i Johnson & Johnson — kankurenty. Adnak «Merk» nie zdoleła raspracavać ułasnuju vakcynu, adnak maje vializnyja mahutnaści dla vytvorčaści vakcyn, jakich nie majuć inšyja kampanii.
Ułady ZŠA da kanca maja atrymajuć 345 młn doz vakcyny, pry nasielnictvie ZŠA 330 miljonaŭ čałaviek. Heta nie ličačy toj kolkaści vakcyn, jakaja pojdzie na ekspart.
Heta vializny pośpiech amierykanskaj bijatechnałahičnaj industryi. Dla paraŭnańnia: u Rasii da kanca paŭhodździa vypuściać maksimum 88 miljonaŭ doz vakcyn.
Miedyk u kavidnym kaściumie, Minsk. Fota Nadziei Bužan
Amierykanskaja kampanija Pfizer, jakaja pracuje ŭ partniorstvie ź niamieckaj BioNTech, z honaram abviaściła, što da kanca hoda ź jaje zavodaŭ vyjdzie jak minimum 2 miljardy doz vakcyny, a nie 1,3 młrd, jak płanavałasia raniej.
Heta vynik technałahičnych navacyj i apieratyŭnaha zapusku dadatkovych vytvorčaściej na zavodach u Marburhu (Niamieččyna), Puursie (Bielhija) i ŭ amierykanskich štatach Misury, Masačusets i Mičyhan. Za apošni miesiac Pfizer-BioNTech padvoili tempy pradukcyi.
U druhim kvartale da vyrabu Pfizer-BioNTechaŭskaj vakcyny Comirnaty padklučajecca šviejcarskaja Novartis, sa žniŭnia — frankfurcki zavod Sanofi, jon adzin da kanca hoda dadatkova vydaść 100 młn doz.
Heta nie adziny zachodni vytvorca vakcyn ad kavidu. Svaje raspracoŭki vyrablajuć amierykanskaja Moderna i brytanska-šviedskaja AstraZeneca. Da ich u najbližejšyja miesiacy dadaducca jašče niekalki vytvorcaŭ. Sukupna za 2021 hod jany, vierahodna, vypradukujuć kala 6 miljardaŭ doz.
Tym časam try rasijskija vytvorcy razam za pieršaje paŭhodździe vypuściać tolki 88 młn doz, ź jakich 83 młn pryjdziecca na Sputnik V, zajaviła 20 lutaha na rasijskim TB vice-premjer urada Rasii Taćciana Holikava. Heta našmat bolš, čym raniejšy prahnoz pra 30 młn doz, ale heta radykalna mienš, čym toj miljard doz, jakija ŭ minułym hodzie anansavaŭ Rasijski fond pramych inviestycyj.
Ab adstavańni z vakcynacyjaj u Rasii śviedčyć i jaje stan na ciapier.
Statystyka vakcynacyi ŭ śviecie, pavodle danych ahienctva Błumbierh, pa stanie na 3 sakavika takaja:
Jeŭrasajuz pa tempach vakcynacyi adstaje ad ZŠA i maje skončyć pryščapleńnie tolki da kanca leta. Hiermanija mahła b iści ŭporavień z amierykancami, ale Bierlin demanstruje jeŭrapiejskuju salidarnaść i prykładna pa roŭnych porcyjach dzielić vakcyny miž usimi krainami ES, navat najmienšymi.
Taćciana Holikava prahnazuje, što ŭ pieršym paŭhodździ 59 młn doz pojduć na ŭnutranyja patreby Rasii, astatnija — na ekspart. Rasija zaklučyła kantrakty na pastaŭku Sputnik V u Vienhryju, Słavaččynu, Mieksiku, Arhiencinu dy inšyja krainy, ale, miarkujučy pa abjomach, jakija Maskva zdolnaja pastavić, havorka pojdzie abo pra minimalnuju kolkaść krain, abo pra adnosna nievialikija abjomy pastavak.
Ułady Biełarusi, zdajecca, i nie ŭzvažvali mahčymaść nabyćcia dla krainy adnačasova vakcyn zachodnich i rasijskich, jak toje robiać Vienhryja, Słavaččyna ci Čyli, vybar Sputnik V abumoŭleny palityčnymi i finansavymi pryčynami. Vynik — spaźnieńnie ŭ vakcynacyi proci jeŭrapiejskich krain.
Były ministr achovy zdaroŭja, a ciapier kiraŭnik Hrodzienskaj vobłaści Uładzimir Karanik. Fota Nadziei Bužan
Miž tym, navat kali ahučanyja Holikavaj ličby buduć dasiahnutyja, a Rasija słyvie niesupadzieńniem płanam i faktaŭ, to, z ulikam ekspartnych abaviazacielstvaŭ, vakcynacyja nasielnictva Rasii, vierahodna, nie zavieršycca i da kanca hoda. Što da Biełarusi, to tady šmat budzie zaležyć ad hipatetyčnaj arhanizacyi vytvorčaści vakcyny na našaj terytoryi.
Biełaruskaja dziaržaŭnaja prapahanda poŭnicca niehatyŭnaj infarmacyjaj, źviazanaj z zachodnimi vakcynami, i pazityŭnaj — pra rasijskuju. Apošniaje nie supiarečyć praŭdzie. Łabaratornyja daśledavańni Sputnik V, sapraŭdy, dali vynik tolki na niekalki pracentaŭ horšy za Pfizer-BioNTech i Moderna. Ale treba adznačyć, što Pfizer-BioNTech užo dakazała efiektyŭnaść i pa fakcie prymianieńnia, izrailskija «palavyja danyja» navat na niekalki dziasiatych pracenta pieravysili łabaratornyja.
Pytańnie tempu vakcynacyi nie tearetyčnaje. Da čaho pryvodziać palityčnyja pamyłki ŭ situacyi pandemii, usie pabačyli ŭ 2020-m: nie tolki kałasalnyja finansavyja traty na lačeńnie i niepracazdolnaść dadatkovych chvorych, ale i da vializnaj śmiarotnaści. Kožny miesiac adstavańnia budzie zabirać tysiačy žyćciaŭ.
U Rasii, u adroźnieńnie ad Biełarusi, statystyka śmiarotnaści nie zakrytaja, i jana pakazvaje, što RF paniesła našmat bolšyja straty, čym usie inšyja jeŭrapiejskija krainy. U Rasii śmiarotnaść u 2020 hodzie vyrasła na 18% proci 2019 hoda. Heta značyć, što ad nastupstvaŭ kavidu ŭ RF tolki za 2020-y pamierła kala 350 tysiač čałaviek. U pieraliku na dušu nasielnictva heta bolš za 5,3 razu, čym u Hiermanii, dzie kiraŭnictva padyšło da pandemii biez papulizmu, a kanclerka Mierkiel nie źjaŭlajecca na ludziach biez maski.
U Biełarusi adziny rajon, jaki apublikavaŭ źviestki ab śmiarotnaści, — Vilejski. I situacyja tam jašče horšaja, čym u Rasii: u 2020-m śmiarotnaść tam vyrasła proci 2019 hoda na 27%. (Dla paraŭnańnia: u Hiermanii śmiarotnaść vyrasła tolki na 3,4%.)
Darečy, vakcynu Pfizer-BioNTech raspracavała niamieckaja para z tureckimi karaniami Uhur Šachin i jahonaja žonka Aźlem Turečy — jakaja aplavucha aficyjnaj rasijskaj i biełaruskaj prapahandzie, jakija hadami malavali akurat Jeŭropu asudžanaj na vymirańnie praź jaje adkrytaść dla emihrantaŭ inšych vyznańniaŭ i ras. Navukoŭcy havorać, što hetyja dzieci tureckich hastarbajtaraŭ ździejśnili revalucyju ŭ farmaceŭtycy, bo ŭpieršyniu była stvoranaja mRNK-vakcyna.
Uhur Šachin i jahonaja žonka Aźlem Turečy — stvaralniki vakcyny Pfizer-BioNTech
A apieratyŭnaść u jaje vytvorčaści — zasłuha transatłantyčnaha supracoŭnictva, kaapieracyi niamieckaj kampanii i amierykanskaj karparacyi. Transatłantyčnaja supraca, miž tym, inšaja tradycyjnaja mišeń antyzachodniaj prapahandy.
«My dahetul dzivimsia, čamu Rasija tearetyčna prapanuje inšym krainam miljony doz [«Sputnika V»], ale ž pry hetym nie dasiahnuła dastatkovaha prahresu ŭ vakcynacyi ŭłasnaha nasielnictva», — ź miakkaj ironijaj zajaviła, vystupajučy ŭ Bruseli, Ursuła fon der Lajen. Kiraŭnica Jeŭrakamisii nazvała heta pytańniem, «na jakoje musić być dadzieny adkaz».
Maskva vymušanaja była reahavać. Pres-sakratarka rasijskaha MZS Maryja Zacharava «nie vyklučyła novych rusafobskich prajaŭ na fonie pośpiechu rasijskich vakcyn».
