Vital Ćvirko — baćka traich dziaciej u razvodzie. Jon raskazaŭ, što prykładna a 12-j hadzinie pačuŭ pach dymu ŭ fizkulturnaj zali. Paśla čaho vyrašyŭ zajści ŭ mužčynskuju raździavalniu.
«Adčyniŭšy dźviery, ja ŭbačyŭ, jak Daniił B. zataiŭ dychańnie i praz 10 sekundaŭ pačaŭ vypuskać dym. Paźniej jon schavaŭ elektronnuju cyharetu ŭ ruku. Ja zrabiŭ jamu zaŭvahu i skazaŭ, kab jon vyjšaŭ z raździavalni. Ja byŭ u stanie afektu (heta moj najlepšy vučań klasy), tamu nia vytrymaŭ i vyrašyŭ pakarać jaho.
Chacieŭ lohka ŭdaryć pa nazie, ale kalena saśliznuła i ŭdaryŭ u vobłaść pachviny», — raskazaŭ jon.
Pavodle versii Daniiła B., jon raniej nie kuryŭ i vyrašyŭ pasprabavać adzin raz, kali znajšoŭ elektronnuju cyharetu ŭ prybiralni.
Pa słovach byłoha nastaŭnika, paśla incydentu vučań sieŭ na prystupki i stanoŭča adkazaŭ jamu na pytańnie «Ci ŭsio narmalna?» Felčarcy stan vučnia Vital Ćvirko patłumačyŭ jak «drenny ad kureńnia». Paźniej jon kazaŭ, što chłopčyk spatyknuŭsia i ŭpaŭ.
Padčas uroku paciarpieły vučań siadzieŭ na łaŭcy, paźniej paprasiŭsia ŭ prybiralniu. Potym viarnuŭsia ŭ raździavalniu i pajechaŭ dadomu.
Pa słovach maci paciarpiełaha Iryny, z pryčyny adsutnaści syna ŭ škole joj patelefanavaŭ klasny kiraŭnik. Paśla babula vučnia pačała vyśviatlać abstaviny zdareńnia. Pa słovach maci, felčarka skazała ŭ telefon, što «chłopiec znachodzicca ŭ šalonym stanie, abkurany».
Dzied chłopca, pačuŭšy ad unuka ab atrymanych ad nastaŭnika traŭmach, adrazu ž pavioz jaho ŭ traŭmapunkt, a potym na UHD da ŭrolaha. Tam vyśvietliłasia, što ŭ chłopčyka hiematoma i razryŭ pravaha jaječka. Na nastupny dzień Daniiłu zrabili aperacyju.
U chodzie sudovaha pasiedžańnia Ćvirko padkreśliŭ, što pryznaje svaju vinu. Jon taksama nieadnarazova prasiŭ prabačeńnia ŭ paciarpiełaha paśla vypiski ź lakarni, vypłaciŭ materyjalnuju kampensacyju za pryčynienuju škodu.
Ćvirko dadaŭ, što paśla incydentu byŭ vymušany zvolnicca. Ciapier jon biespracoŭny.
U siamji paciarpiełaha da nastaŭnika fizkultury pretenzij na siońniašni momant niama. Pamier pakarańnia jany vyrašyli pakinuć na rašeńnie sudu.
