Demanstrant u Minsku. Žnivień 2020-ha.
Niezaležnaja sacyjałohija ŭ Biełarusi pad zabaronaj, tamu hramadstva, u jakim my žyviom, stała dla nas šmat u čym terra incognita. My viedajem jaho empiryčna, a pra rehijanalnyja adroźnieńni, naprykład, možna mierkavać tolki pa ŭskosnych pakazčykach. Sacyjołahi paraŭnoŭvajuć aŭtarytarnyja režymy z rakoj pad lodam. My viedajem, što vada ciače, ale jak chutka, u jakich miescach viry i buchty? Ekanamist Pavieł Danejka acharaktaryzavaŭ stan biełaruskaha hramadstva inšaj mietafaraj: heta jak pacyjent z deficytam kalcyju. Taki arhanizm schilny da pierałomaŭ, ale što jon złomić: palec? ruku? šyjku ściahna? — pradkazać niemahčyma.
«Naša Niva» padličyła kolkaść fihurantaŭ palityčnych spraŭ pa miescy ich žycharstva.
Varta zaznačyć napierad, što dakładnaja ličba fihurantaŭ palityčnych spraŭ nieviadomaja. U śpisie, sabranym pravaabaroncami «Viasny», — 850 proźviščaŭ. «Naša Niva» dadała da jaho jašče 5 — viadomych nam, ale adsutnych u śpisie viasnoŭcaŭ abo najaŭnych u śpisie na dissidentby.com i adsutnych u viasnoŭcaŭ.
Lubyja śpisy buduć niapoŭnyja ŭ situacyi, kali ŭ krainie idzie bolš za 2300 palityčnych spraŭ. Uziać navat samyja hučnyja spravy, naprykład, «spravu Aŭtuchoviča». My navat nie viedajem miescy žycharstva bolšaści jaje fihurantaŭ. Ale statystyčnaja navuka kaža nam, što pry vybarcy z 855 proźviščaŭ ahulnaja karcina budzie praŭdzivaja.
Pa stanie na 26 lutaha nam viadoma pra nastupnuju kolkaść fihurantaŭ palityčnych spraŭ.
- Bresckaja 183
- Viciebskaja 33
- Homielskaja 70
- Hrodzienskaja 112
- Mahiloŭskaja 24
- Horad Minsk 312
- Minskaja 58
- Miesca žycharstva niajasnaje 63
U praporcyi na 100 tysiač nasielnictva heta
- Bresckaja 13,5
- Viciebskaja 2,9
- Homielskaja 5,0
- Hrodzienskaja 10,9
- Mahiloŭskaja 2,4
- Horad Minsk 15,4
- Minskaja 3,9
Jak bačym, akramia Minska, asabliva aktyŭny ŭdzieł u baraćbie za hramadzianskija pravy i suprać dyktatury ŭziała Bresckaja vobłaść i, u trochi mienšaj stupieni, Hrodzienskaja. Homielskaja vobłaść vyrazna vyłučajecca represiŭnaściu siarod uschodniebiełaruskich. Ci źviazana heta ź jaje bolšaj industryjalizavanaściu? Ci z tym tym, što Siarhiej Cichanoŭski — karaniami z Homiela? Ci z susiedstvam Ukrainy? Fakt, što i Bresckaja vobłaść apiaredžvaje Hrodzienskuju. Brest i Pinsk byli najbolšymi centrami procistajańnia ŭ žniŭni-vieraśni 2020-ha.
Dziaržprapahanda sprabavała padać pratesty jak «polskuju intryhu», ale ličby pakazvajuć, što kolkaść represavanych, jakaja adlustroŭvaje stupień pratesnaj aktyŭnaści, vyšejšaja ŭ abłaściach, dzie dola palakaŭ i katalikoŭ mienšaja (na Bieraściejščynie bolš represavanych, čym na Hrodzienščynie, a na Homielščynie — čym na Viciebščynie).
Dziaŭčaty z płakatam u Słucku, Minskaja vobłaść. Žnivień 2020-ha. Ilustracyjnaje fota.
U kožnym razie, ličby represij śviedčać, što ruch za svabodnyja vybary i suprać Alaksandra Łukašenki — ahulnanacyjanalny, a represii nabyli masavy charaktar va ŭsich rehijonach.
U adnoj Mahiloŭskaj vobłaści ciapier bolš palitviaźniaŭ, čym było va ŭsioj krainie ŭ 2014—2019 hadach. A ŭ Minsku, Breście, Pinsku, Hrodnie, Smarhoni viaźni sumleńnia jość u kožnym mikrarajonie, siarod vypusknikoŭ kožnaj škoły.
