Fota Depositphotos.com
Niahledziačy na ich vyhlad, hetyja žyvioły nie źjaŭlajucca reptylijami, jak moža adrazu padacca. Nasamreč jany adzinyja ŭ śviecie łuskavatyja mlekakormiačyja, tamu ich jašče nazyvajuć łuskavatymi muraškajedami. U daŭžyniu hetyja istoty mohuć vyraści da mietra, piša DW.
Ličycca, što słova «panhalin» pachodzić ad małajskaha «toj, chto zvaročvajecca» — i heta toje, čym jany admietnyja. Panhalin zvaročvajecca kłubkom padčas snu abo dla achovy. Istoty žyvuć u norach i charčujucca muraškami i kuzurkami.
Usie vidy panhalinaŭ znachodziacca pad pahrozaj źniknieńnia. Pryčyna tamu brakańjerstva i vyrubka lasoŭ. Suśvietny fond dzikaj pryrody nazvaŭ ich «žyviołami, jakija čaściej za ŭsich vykarystoŭvajucca dla prodažu».
Łuska panhalina šyroka cenicca ŭ tradycyjnaj miedycynie Kitaja i Vjetnama, a jaho miasa ličycca dalikatesam u niekatorych azijackich krainach. Praz heta panhaliny stali vielmi pryvablivymi dla brakańjeraŭ, u vyniku čaho ich usio čaściej pierapraŭlajuć kantrabandaj z Afryki ŭ Aziju.
Adzin kiłahram miasa žyvioły moža prynieści na čornym rynku niekalki tysiač dalaraŭ. Tolki za apošniaje dziesiacihodździe było pradadziena bolš za 1 miljon asobin. Heta pryvodzić da imklivaha skaračeńnia papulacyi.
Na pačatku 2020 hoda ličyłasia, što mienavita miasa panhalina stała krynicaj raspaŭsiudžvańnia karanavirusa. Ciapier ža bolšaść navukoŭcaŭ miarkujuć, što pieršakrynicaj usio ž taki byŭ kažan. Adnak pandemija vyjaviła niebiaśpieku ŭžyvańnia dzikaha miasa čałaviekam.
Daśledčyki robiać usio mahčymaje, kab zachavać panhalinaŭ. Uzmacnilisia pakarańni dla kantrabandystaŭ, jakija handlujuć hetymi žyviołami, a ŭ Kitai ŭviali zabaronu na vykarystańnie panhalinaŭ u miedycynskich metach.