Valancina Jaščanka źjaŭlajecca ŭłaśnicaj adnoj z kvater u budynku, da jakoha prymykaje dvarovaja terytoryja, padzielenaja miž susiedziami. Na płocie, jaki źviernuty ŭnutr jaje padvorku, 7 listapada źjaviŭsia murał — vyjava vieršnika na bieł-čyrvona-biełym fonie. Murał bačny z vulicy, jakoju chodzić haradski hramadski transpart. Heta mocna niervuje miascovuju ŭładu.
17 lutaha ŭ sudzie Kalinkavickaha rajonu pačali sudzić Valancinu Jaščanka pavodle abvinavačvańniaŭ u praviadzieńni niesankcyjanavanaha masavaha mierapryjemstva — pikietavańnia. Spravu razhladaje sudździa Śviatłana Kuhiejka.
Valancina Jaščanka nie pryznała svaju vinu i zajaviła chadajnictva ab spynieńni administracyjnaje spravy. Jana patłumačyła, što ŭ zakonie ab dziaržaŭnym hierbie ad 1991 hoda, hierb «Pahonia» vyhladaje inakš, čym vyjava, jakaja majecca na płocie ŭ jaje padvorku. Hetak ža i fon z čyrvonaj pałasy na biełym tle nie moža ličycca ściaham, bo nie vytrymanyja paznačanyja ŭ apisańni nacyjanalnaha ściaha, jaki byŭ dziaržaŭnym u 1990-ja hady, patrabavańni.
Akramia taho, u materyjałach spravy nie ŭkazana, jakija ž kankretna hramadska-palityčnyja intaresy vykazała Jaščanka svajoj vyjavaj.
Sudździa Śviatłana Kuhiejka abviaściła ŭ sudzie pierapynak da 23 lutaha, kab zapatrabavać z RAUS materyjały pravierki, jakaja adbyvałasia ŭ listapadzie, i atrymać niekatoryja inšyja dakumienty.
