U studzieni ab nieabchodnaści začynić turmu ŭ Huantanama taksama zajaviŭ ministr abarony ZŠA Łojd Ościn. Jon prapanavaŭ zabiaśpiečyć asobam, jakija zastajucca ŭ turmie, pravavuju dapamohu i humannaje staŭleńnie, a taksama raspracavać płan dziejańniaŭ dla pieramiaščeńnia źniavolenych.
Vajskovaja turma ŭ Huantanama — na terytoryi nie ZŠA, a Kuby — była stvorana ŭ studzieni 2002 hoda, paśla pačatku vajny ŭ Afhanistanie. U Huantanama nakiroŭvalisia padazravanyja ŭ ździajśnieńni ciažkich złačynstvaŭ, u tym liku za ŭdzieł u dziejnaści mižnarodnych terarystyčnych struktur.
Turma ŭ Huantanama nabyła sumnuju viadomaść paśla abvinavačvańniaŭ z boku pravaabaroncaŭ, jakija śćviardžali, što da źniavolenych užyvalisia katavańni, a ich pravavy status zastavaŭsia nieviadomym.
Začynić turmu ŭ Huantanama abiacaŭ jašče Barak Abama padčas baraćby za prezidenctva. Jon vydaŭ zahad, jaki praduhledžvaje zakryćcio turmy. Niekalki dziasiatkaŭ źniavolenych byli pieradadzienyja inšym dziaržavam. Paśla hetaje rašeńnie było admieniena prezidentam Donaldam Trampam, jaki taksama dazvoliŭ sadzić u turmu ŭ Huantanama novych źniavolenych.
Na piku ŭ Huantanama ŭtrymlivałasia kala 780 čałaviek, ciapier ich 40.
