«9 lutaha my pryjechali ŭ SIZA, kab pieradać synu nieabchodnyja rečy. Paśla taho jak muž zapoŭniŭ dakumenty, dziažurny paviedamiŭ jamu, što ŭ pieradačy admoŭlena. Pryčyna — Aleh adbyvaje pakarańnie», — raskazvaje mačycha palitviaźnia Taciana.
Baćki Aleha adrazu źviarnulisia da advakatki, jakaja sustrełasia z chłopcam užo na nastupny dzień.
«Joj syn raskazaŭ, što vyrašyŭ abviaścić haładoŭku z-za taho, što jamu nie dachodzili listy. Paśla čaho z 8 lutaha jaho źmiaścili ŭ karcar, dzie jon prabudzie da 14 lutaha ŭklučna», — kažuć baćki Aleha Rubca.
Viktar i Taciana Rubiec pryznajucca, što syn na praciahu doŭhaha času nieadnarazova cikaviŭsia ŭ administracyi, čamu karespandencyja ad svajakoŭ jamu dachodzić ź pierabojami, a listoŭ ad siabroŭ jon zusim nie atrymlivaje. Nie damohšysia ŭciamnaha adkazu, jon na praciahu 5 dzion admaŭlaŭsia ad ježy.
«My atrymali ad jaho list na minułych vychodnych, dzie jon zavualavana papiaredziŭ, kab nie pryvozili jamu pieradačy bližejšym časam», — zaŭvažajuć baćki.
Baćki Aleha padkreślili, što vielmi pieražyvajuć za jaho zdaroŭje, choć raniej jon i nia skardziŭsia na takija prablemy.
«Advakatka skazała, što vyhladaje jon adpaviedna miescu, u jakim znachodzicca, — kaža Taciana. — U Aleha astma. My, viadoma, pieradali jamu nieabchodnyja leki. Ale vielmi turbujemsia, kab u jaho nie było prystupaŭ. Aleh taksama pisaŭ u listach, što bolš za miesiac nia byŭ na prahułcy. Pryčyn dla hetaha niama. Sam jon heta tłumačyć svojeasablivym presinham ci lanotaj supracoŭnikaŭ».
Aleh Rubiec skončyŭ licej u Pinsku i pracavaŭ traktarystam pa adpracoŭcy. Byŭ fanatam futbolnaha klubu «Vołna». Jaho zatrymali ŭ Pinsku 10 žniŭnia i mocna źbili. Rubca padazrajuć pa spravie ab masavych biesparadkach (art. 293 Kryminalnaha kodeksu).
