Taresie Šyrmie było 53 hady, jana rodam ź vioski Rapiejki, što kala Lidy, piša Biełsat.
U 1986 hodzie dziaŭčyna pryjechała rabić u Leninhrad, dzie dałučyłasia da miascovaj katalickaj supolnaści. Vykładała ŭ niadzielnaj škole, supracoŭničała z katalickaj dabračynnaj arhanizacyi «Karytas», šmat času addavała naviedvańniu chvorych, arhanizoŭvała pracu sacyjalnaj dapamohi.
Na miažy stahodździaŭ razam z ksiandzom Siarhiejem Surynovičam, jaki tady jašče byŭ studentam duchoŭnaj sieminaryi, jana stała arhanizataram rehularnych imšaŭ na biełaruskaj movie ŭ parafii Uśpieńnia Najśviaciejšaj Panny Maryi ŭ Sankt-Pieciarburhu, jakija ździajśniali śviatary-vychadcy ź Biełarusi i arcybiskup Tadevuš Kandrusievič. Dva razy na miesiac Taresa viała prahramy na biełaruskaj movie na Pieciarburhskim chryścijanskim radyjo «Maryja», a taksama redahavała hazietu «Krynica» na biełaruskaj movie.
Sa žniŭnia 2020 hoda Taresa znoŭ aktyŭna ŭliłasia ŭ žyćcio niefarmalnaha biełaruskaha ziamlactva ŭ Sankt-Pieciarburhu. Rehularna pryjazdžała na akcyi pratestu pierad adździaleńniem ambasady Biełarusi ŭ Sankt-Pieciarburhu, a kali pačalisia zatrymańni pratestoŭcaŭ, jeździła pa adździaleńniach palicyi dy dapamahała zatrymanym aktyvistam.
Jaje žyćcio raptoŭna abarvałasia 5 lutaha. Svajaki spadziajucca pachavać jaje ŭ Biełarusi, u Lidskim rajonie, pobač z baćkami.
