28 śniežnia 2020 hoda 24-hadovaja dziaŭčyna pryjšła ŭ rajonnuju palikliniku Frunzienskaha rajona i nakiravałasia ŭ kabiniet zahadčyka adnaho z adździaleńniaŭ, dzie nakinułasia na miedyka — nanosiła ŭdary i chapała za vałasy. Pačuŭšy kryki, pacyjenty zajšli ŭ kabiniet i spynili minčanku. Paśla hetaha jana pakinuła palikliniku.
Praz usiaho paru dzion dziaŭčyna znoŭ pryjšła ŭ hetuju ž ustanovu achovy zdaroŭja. U kalidory jana sustreła zahadčycu ŭžo inšaha adździaleńnia palikliniki i taksama nakinułasia na jaje z kułakami. Na dapamohu doktarcy, jak i ŭ papiarednim vypadku, pryjšli pacyjenty palikliniki.
U dalejšym vyśvietliłasia, što minčanka takim čynam «pomściła» svajmu byłomu maładomu čałavieku. Napiaredadni chłopiec prapanavaŭ rasstacca. Pakryŭdžanaja dziaŭčyna ŭ svaju čarhu spačatku prychodziła da jaho na pracu pa tłumačeńni i paškodžvała jaho aŭto, a zatym daviedałasia, dzie i kim pracuje novaja kachanaja maładoha čałavieka — zahadčycaj u rajonnaj paliklinicy, — i adpraviłasia da jaje.
Dziaŭčynie vystavili abvinavačvańnie pa č. 2 art. 339 KK («Złosnaje chulihanstva») i ŭziali pad vartu. Joj treba prajści psichołaha-psichijatryčnuju ekśpiertyzu.
