Pieradačy na Akreścina ciapier zabaronienyja. Kažuć, što praz karanavirus. Ilustracyjnaje fota Nadziei Bužan
Vital Tarhonski adbyvaŭ 25 sutak aryštu. Amal uvieś čas — na Akreścina. Napačatku było ciarpima, ale paśla 23 studzienia ŭmovy źmianilisia. Nahadajem, u tuju subotu ŭ mnohich rajonach ludzi vyjšli na pratest.
«Rankam 23 studzienia zabrali matracy, paduški, koŭdry. Skazali, viernuć pierad adbojem, ale tak i nie addali da kanca majho terminu. Choć niekatorym kamieram praz 3-5 dzion matracy viarnuli.
U hety ž dzień adklučyli aciapleńnie. Rankam my jašče sušyli na batarei pamytyja rečy, a ŭžo ŭviečary jana astyła. Z tych časoŭ tak i nie ŭklučałasia. My prasili, ale čuli admazki ad supracoŭnikaŭ: maŭlaŭ, my nie ŭ kursie, zaŭtra skažycie dziažurnamu. Bałazie, na vulicy było nie tak chałodna».
Surazmoŭca zaŭvažaje, što jamu jašče pašancavała siadzieć na trecim paviersie. Jaho sukamiernik, jakoha pieraviali z druhoha paviercha, raskazvaŭ, što jany tam vielmi miorźli. Uvieś čas byli ŭ kurtkach, zdymali ich, tolki kab umycca.
Z 15 studzienia mužčynu ni razu nie zvadzili ŭ duš — ludzi mylisia vadoj z butelek, stojačy nad unitazam. Špacyry, jakija spačatku byli ledź nie štodzień, skončylisia 21 studzienia.
Čatyrochmiesnaja kamiera, u jakoj siadzieŭ Vital, časta była pierapoŭnienaja. Dva dni ŭ joj nočyła 13 čałaviek: piaciora na hołych škonkach, šaściora na padłozie, dvoje na łaŭcy.
U žančyn było nie lepš.
«Padčas adnoj pravierki, kali žančyny nazyvalisia, my naličyli pa hałasach čałaviek 20 z adnoj kamiery», — dzielicca nazirańniami mužčyna.
Z kamiery zabrali taksama ŭsie knihi, arkušy papiery, skanvordy. Kali Vitalu viartali dziońnik, kudy jon zapisvaŭ svaje nazirańniami padčas aryštu, tam byli vydranyja staronki z natatkami.
Adzin ź jaho sukamiernikaŭ zajechaŭ na sutki z sumkaj ź nieabchodnymi rečami: ciopłym adzieńniem, hihijeničnymi srodkami. Sumku pry «zasialeńni» zabrali. Za tyja niekalki dzion, što jany siadzieli razam, rečy mužčynu tak i nie vydali.
Vital ukazvaje i na inšyja parušeńni pravoŭ:
«31 studzienia da nas u kamieru zakinuli niekalki nieasudžanych čałaviek. U ich užo skančałasia troje sutak z momantu zatrymańnia, ich pavinny byli adpuskać. Kali jany stali kazać pra heta, im pryvieźli novyja pratakoły. Nakidali źvierchu artykuły 23.4 i 17.1 (Niepadparadkavańnie i Chulihanstva, nibyta za nieprystojnyja žesty). U vyniku dali pa 15 i 9 sutak».
Pa słovach surazmoŭcy, supracoŭniki Akreścina nie chavajuć: nievynosnyja ŭmovy dla palityčnych robiacca śpiecyjalna.
«Na ranišniaj praviercy mianie adzin spytaŭ: «Jak tabie tut?» — «Nie vielmi», kažu. — «Vy dla mianie zdradniki, tut usio robim tak, kab vy siudy nie zachacieli viartacca».
Na prośbu vydać paścielnuju bializnu pytali artykuł. Nazyvaŭ 23.34. «Vam tut nie kurort!» — adkazvali».
