Film źniali pa matyvach adnajmiennaha ramana indyjskaha piśmieńnika Aravinda Adyhi, jaki atrymaŭ Bukieraŭskuju premiju 2008 hoda.
Film z udziełam balivudskich aktoraŭ Adarša Hurava, Pryjanki Čopra i Radžkumara Rao raspaviadaje historyju maleńkaha chłopčyka Bałrama, jaki byŭ vymušany kinuć škołu paśla śmierci baćki. Jon biarecca za lubuju pracu, kab dapamahčy svajoj siamji.
Bałrama nazaŭsiody zapomniŭ, jak nastaŭnik adnojčy nazvaŭ jaho «biełym tyhram», što značyć «asablivy čałaviek». Hałoŭnaja meta Bałrama — vyrvacca ź nižejšaj kasty i stać vialikim čałaviekam.
Adnojčy jamu ŭdajecca znajści pracu kiroŭcam. Paśla hetaha Bałrama zabivaje svajho pracadaŭcu, a sam pačynaje žyćcio pad novym imiem.
Mnohija indyjskija kinakrytyki abvinavacili pradziusieraŭ filma ŭ stvareńni čarhovaj kinakarciny, stereatypna prasiaknutaj kadrami biednych i pryhniečanych žycharoŭ Indyi, piša vydańnie DW. U toj ža čas indyjskaja scenarystka Anu Sinhch Čoŭdchary, jakaja naradziłasia ŭ paŭnočnaj Indyi, dzie adbyvajecca dziejańnie filma, śćviardžaje, što žyćcio nižejšych kast u Indyi vielmi dakładna pakazana ŭ filmie. «Heta lusterka dla indyjcaŭ vyšejšaj kasty, jakija prahnuć ułady, viaduć peŭny ład žyćcia i nie zadumvajucca, jak heta ŭpłyvaje na ludziej, što prysłužvajuć im», — ličyć jana.
Film «Bieły tyhr» žyvie kantrastami. Naprykład, pakazvajecca, u jakim raskošnym šmatpakajovym domie žyvuć pracadaŭcy Bałrama, a samomu Bałramu i inšym kiroŭcam vyłučajuć miesca ŭ padvale. «Film vyjaŭlaje kłasava-kastavy raskoł, jaki indyjcy bačać štodnia, ale zapluščvajuć na heta vočy», — ličyć Anu Sinhch Čoŭdchary.
Ale ci jość sens paraŭnoŭvać mastacki tvor z realnaściu? «Ja nienavidžu ideju pra toje, što filmy adlustroŭvajuć realnaść, bo filmy — heta štučnyja kanstrukcyi. Heta pastanovačnaja realnaść», — śćviardžaje indyjski kinakrytyk Bcharadvadž Ranhan.
Małavierahodna, što ŭ Indyi film budzie mieć takuju ž papularnaść, jak i va ŭsim śviecie, bo Netfliks — adna z samych darahich płatform u Indyi, jakaja ŭ indyjskim hramadstvie źjaŭlajecca pryvilehijaj, što daloka nie kožny moža sabie dazvolić.
Anu Sinhch Čoŭdchary kaža: «Heta film, jaki prymusić vas adčuvać siabie niajomka, zadumvacca i zadavacca pytańniami, ale heta nie toje, što cikavić indyjskuju aŭdytoryju. Heta nie toj film, jaki buduć hladzieć žychary Indyi, bo jany sami pra heta ŭsio viedajuć».
