Hienprakuratura anansavała pryznańnie biełaruskaha nacyjanalnaha bieła-čyrvona-biełaha ściaha ekstremisckim «po prośbam trudiaŝichsia».
Hetaha možna było čakać. Faktyčna, choć dziaržava i nazyvajecca «Respublika Biełaruś», daminujučyja pazicyi ŭ joj ciapier zajmajuć savieckija ludzi, dla jakich biełaruskaje — čužoje, a savieckaje — svajo. Adpaviedna, i bieł-čyrvona-bieły ściah dla ich — nie nacyjanalny, a «apazicyjny».
Zabarona ściaha — heta vynik taho šoku, jaki łukašenkaŭcy pieražyli ŭ žniŭni, kali raźviejałasia ŭtulnaja iluzija ich ułasnaj prapahandy i jany pabačyli na vulicach sotni tysiač ludziej z BČB dy zrazumieli, u jakoj jany maralnaj izalacyi. Łukašenkaŭcy kirujucca palityčnymi patrebami, dumajuć, što zabaronaj simvała jany ŭskładniać palityčnuju mabilizacyju svaich praciŭnikaŭ, a na nacyjanalnaje vymiareńnie im plavać.
Čytajcie taksama: «Budučynia hetaha ściaha im hłyboka da adnaho miesca»
Arhumient pra vykarystańnie BČB kimści padčas vajny nie vytrymlivaje krytyki: nu pryznajcie ekstremisckimi zaadno ściahi Rasii, Ukrainy, Litvy, Francyi i ŭsich astatnich jeŭrapiejskich krain, pad imi taksama chadzili niečyja kałabaranty. I, jak kazaŭ vieteran vajny Vasil Bykaŭ, zabaranicie zaadno štany, tamu što ich nasiŭ Hitler. Inšyja narody, adnak, viedajuć, što pad ściahami chadzili i śviatyja ludzi.
Kali rašeńnie ab pryznańni biełaruskaha ściaha ekstremisckim budzie pryniataje, ci jano dapamoža łukašenkaŭcam utrymać uładu daŭžej i ci jano pahubić biełaruskuju nacyjanalnuju śviadomaść i kulturu?
Dyktatury padajuć ad ekanamičnych i sacyjalnych prablem, niezaležna ad simvoliki.
U Savieckim Sajuzie za nacyjanalnyja ściahi sadzili ŭ turmu, heta nie ŭratavała jaho ad razvału. A padčas źviaržeńnia Čaŭšesku demanstranty na barykadach najpierš vyrazali kamunistyčny hierb sa ściaha.
Čytajcie taksama: Sapraŭdnyja biełaruskija simvały: voś što treba viedać pra Pahoniu i BČB
U toj ža čas zabarona ściaha budzie ŭspryniataja biełaruskimi patryjotami jak abraza, jak abviaščeńnie vajny. Savieckija ludzi nie razumiejuć, što hety ściah značyć dla biełarusaŭ.
Biełaruskija nacyjanalnyja simvały śviatyja dla miljonaŭ biełarusaŭ, jany ŭžo ŭ litaralnym sensie palityja kryvioju. Nacyjanalnyja pačućci — dalikatnyja, luboje taptańnie na ściahu vyklikaje mocnuju reakcyju. Zabarona nacyjanalnaha ściaha nie budzie vyklučeńniem — jana stanie mahutnaj matyvacyjaj dla procidziejańnia i katalizuje padziei.
Namier uładaŭ vykliča masavyja pietycyi hramadzian u dziaržaŭnyja orhany. Možna čakać i masavych akcyj pratestu ŭ Minsku, i mocnaj chvali salidarnaści biełarusaŭ śvietu.
My bačym, što biełarusy za miežami RB u absalutnaj bolšaści, akramia redkich hrupak, prykormlenych pasolstvami, vyznajuć bieł-čyrvona-bieły ściah.
Dynamiku palityčnaj baraćby zabarona ściaha paskoryć, a što z kulturaj? Refierendum 1995 hoda mieŭ fatalnyja nastupstvy dla biełaruskaj movy, za 25 hadoŭ Biełaruś pieražyła tatalnuju moŭnuju rusifikacyju. Moža być, i zabarona ściaha pryviadzie da fatalnych nastupstvaŭ dla nacyjanalnaj śviadomaści?
Zabarona ściaha nahadvaje, što budučynia biełarusaŭ jak nacyi, budučynia biełaruskaj kultury ciapier zaležyć ad kožnaha biełarusa, na dziaržavu nie davodzicca spadziavacca.
