Cieła žurnalista z Nalčyka Cimura Kuašava znajšli 1 žniŭnia 2014 hoda la darohi ŭ lesie na ŭskrainie Nalčyka z hiematomami, rankami i śledam ad špryca pad pachaj. Niahledziačy na najaŭnaść śladoŭ ad hvałtu, aficyjnaj pryčynaj śmierci 26-hadovaha aktyvista nazvali vostruju karanarnuju niedastatkovaść.
Jak vyśvietlili aŭtary rasśledavańnia, 13 lipienia ŭ Nalčyk prybyŭ Kanstancin Kudraŭcaŭ, zapis razmovy ź jakim apublikavaŭ Alaksiej Navalny.
Na momant śmierci Kuašava ŭ haradach pobač z Nalčykam, pavodle źviestak žurnalistaŭ, taksama znachodzilisia inšyja hieroi budučaha rasśledavańnia atručvańnia Navalnaha — lekar Ivan Vosipaŭ i aficery Dzianis Mačykin i Raman Maciušyn. U apošnich dvuch byli zvarotnyja kvitki na 30 lipienia, ale jany pieranieśli ich na dzień paźniej. Vosipaŭ pieranios vylet z 30 lipienia na 1 žniŭnia.
Baćka Kuašava Chambi Kuašaŭ raspavioŭ The Insider, što ŭzory kryvi žurnalista pa patrabavańni baćki adpravili ŭ Maskvu, kab pravieryć viersiju ab atručvańni. Ekśpiertyza śladoŭ jadu nie vyjaviła, pry hetym padpisaŭ jaje Vasil Kałašnikaŭ, jaki zhadvaŭsia ŭ razmovie z Kudraŭcavym, apublikavanym Navalnym.
Cieła aktyvista hramadskaha rehijanalnaha ruchu «Adzinstva» Rusłana Mahamiedrahimava vyjavili 24 sakavika 2015 hoda ŭ Kaśpijsku (pryharad Machačkały). Pavodle aficyjnaj viersii, jon pamior ad udušša, ale śladoŭ hvałtu pry hetym nie vyjavili. Blizkija aktyvista śćviardžali, što na jaho šyi byli dva ślady, padobnyja na ślady ad ukołaŭ šprycam. Pavodle źviestak aŭtaraŭ rasśledavańnia, u studzieni 2015 hoda Vosipaŭ dvojčy prylataŭ u Machačkału na niekalki dzion, a 20 sakavika jon prylacieŭ va Uładzikaŭkaz i viarnuŭsia ŭ Maskvu praz dva dni paśla śmierci aktyvista.
Pry hetym žurnalisty ŭ dadzienym vypadku dapuskajuć imaviernaść supadzieńnia, bo ŭ Vosipava byli i inšyja pajezdki ŭ Machačkału, a zabojstva z dapamohaj atručvańnia praz ukoł niecharakterna, ličać aŭtary, dla mierkavanych supracoŭnikaŭ FSB.
Mikita Isajeŭ, lidar ruchu «Novaja Rasija» i daradca kiraŭnika «Spraviadlivaj Rasii» Siarhieja Mironava, pamior 16 listapada 2019 hoda ŭ ciahniku Tamboŭ-Maskva. Aficyjnaj pryčynaj śmierci staŭ sardečny prystup, adnak jašče da vynikaŭ ekśpiertyzy cieła niabožčyka kremiravali, jak toj i zaviaščaŭ. Pa najaŭnych u Bellingcat danych pieralotaŭ supracoŭnikaŭ FSB aŭtary rasśledavańnia vykazali zdahadku, što za Isajevym pačali sačyć u śniežni 2018 hoda padčas jaho pajezdki ŭ Čelabinsk. Žurnalisty znajšli siem supadzieńniaŭ pa horadzie i datach pajezdak Isajeva i supracoŭnikaŭ śpiecsłužby.
Pry hetym u dzień śmierci Isajeva ŭ Tambovie nichto z supracoŭnikaŭ FSB pad svaimi imionami nie vyjaŭlajecca, adznačyli aŭtary rasśledavańnia. Pa mietadanych telefona adnaho ź mierkavanych udzielnikaŭ zamachu žurnalisty vyśvietlili, što jon znachodziŭsia ŭ Tambovie 1 listapada 2019 hoda. Aŭtary rasśledavańnia vykazali zdahadku, što supracoŭniki FSB mahli albo vykarystoŭvać inšyja imiony, albo začyścić bazu.
Bellingcat i The Insider adznačyli, što Isajeŭ «byŭ absalutna łajalnym Kramlu palitykam» i «nichto z atačeńnia Isajeva nie maje niejkaha praŭdapadobnaha tłumačeńnia, čym praŭładny «patryjot» moh nie dahadzić FSB».
