Fota Depositphotos.com
Źjaŭleńnie novych varyjantaŭ karanavirusa sihnalizuje pra budučyniu, dzie baraćba z pandemijaj zaciahniecca na niavyznačany termin, piša vydańnie The Wall Street Journal.
Epidemijołahi papiaredžvajuć, što novyja štamy kavidu raspaŭsiudžvajucca chutčej i pavialičvajuć ryzyku śmierci. U toj ža čas vakcyny suprać ich stanoviacca mienš efiektyŭnymi, što pahražaje zaciahnieńniem karancinu i bolšaj kolkaściu śmierciaŭ. Adnak, pa słovach navukoŭcaŭ, heta nie značyć, što infiekcyju niemahčyma strymać.
«Dla karanavirusa charakterna chutkaje muciravańnie, što pryvodzić da źjaŭleńnia novych štamaŭ», — śćviardžaje Entani Charnden, doktar, jaki kansultuje ŭłady ŭ Vialikabrytanii. «My možam apynucca ŭ situacyi, kali nam štohod budzie patrebna novaja vakcyna, kab dać rady novym varyjantam kavidu», — śćviardžaje jon.
Entani Faŭčy, hałoŭny daradca Bajdena pa pytańniach pandemii, pierakonvaje, što ciapierašnija vakcyny zastajucca efiektyŭnymi ŭ baraćbie z novymi štamami. «Toje, što my budziem rabić i ŭžo robim, — madyfikacyja isnujučych vakcyn. Najlepšy sposab praduchilić mutacyi — vakcynavać jak maha chutčej i jak maha bolš ludziej».
Vializnaja kolkaść vypadkaŭ zachvorvańnia pa ŭsim śviecie dała virusu mahčymaść muciravać i raspaŭsiudžvacca chutčej, čym heta było na pačatku pandemii. Mienavita ŭźniknieńnie novych štamaŭ zatrymlivaje toj dzień, kali śviet vierniecca da svajho zvykłaha stanu dziakujučy vakcynam. Taksama heta pavialičvaje vierahodnaść pieryjadyčnych uspyšak infiekcyi navat paśla masavaj vakcynacyi nasielnictva. Navukoŭcy miarkujuć, što mižnarodnyja abmiežavańni na pajezdki buduć dziejničać ź pierapynkami na praciahu mnohich hadoŭ.
Isnuje vialikaja imaviernaść, što buduć uźnikać novyja štamy, navat kali ŭzrovień imunitetu ŭ raźvitych krainach budzie dastatkova vysokim, kab strymać raspaŭsiudžvańnie kavidu. Sprava ŭ tym, što biednyja krainy na praciahu niekatoraha času nie buduć mieć dostupu da vakcynacyi, što vykliča novyja mutacyi karanavirusa.
Tym nie mienš, prahramy vakcynacyi va ŭsim śviecie pavinny vyklikać skaračeńnie kolkaści surjozna chvorych ludziej. Imavierna, što kryvaja rostu zachvorvańnia pojdzie ŭniz. Padčas hetaha spadu navukoŭcam budzie nieabchodna adaptavać vakcyny da novych varyjantaŭ, kab nie dapuścić rostu zaražeńnia.
Karanavirus muciruje nie tak časta, jak virus hrypu, dla jakoha patrabujecca vakcynacyja štohod. Ale vidavočna, što ludziam pieryjadyčna treba budzie atrymlivać dadatkovyja pryščepki, kab padtrymlivać svaju achovu ad virusa.
