MonkeyFood: Niemahčyma pracavać u krainie, dzie ty abaviazany maŭčać
Viehan-kaviarnia MonkeyFood praisnavała ŭ Minsku piać hod. Stvaralniki zavajoŭvali fud-rynak, vyjazdžajučy sa svaimi stravami na roznyja festy. Paśla źjavilisia dastaŭka i pieršaja kropka na vulicy Bahdanoviča. A nieŭzabavie i jašče adno miesca na Kastryčnickaj. U prajekta nie było bahatych inviestaraŭ, zatoje ad pačatku miełasia dobraja kamanda. Raśli vyklučna svaimi siłami: usio zaroblenaje adrazu ŭkładvali ŭ raźvićcio.
Kamanda MonkeyFood
Za hetyja hady čaho tolki nie pieražyła kamanda «Manki-fud». Navat karanavirus, padčas jakoha atrymałasia zachavać zarobki supracoŭnikaŭ, i žnivieńskija chvalavańni, kali było strašna za kurjeraŭ, što razvozili zamovy praz navały aŭtazakaŭ. Ale ŭsiaho adzin niepracoŭny dzień 26 kastryčnika pastaviŭ kryž na dalejšaj dziejnaści.
«26 kastryčnika, u dzień anansavanaj nacyjanalnaj zabastoŭki, my prosta zrabili ŭ sacyjalnych sietkach salidarny post i pradavali haračyja napoi pa salidarnych koštach: možna było płacić kolki chočaš i možaš. I za piać nastupnych dzion, pamiataju, da nas pryjšło adrazu siem pravierak. Niekatoryja «hości» adkrytym tekstam kazali, što jany tut mienavita ŭ jakaści pomsty za 26-ha. U vyniku štrafaŭ i dziaržaŭnych pošlin za sudy nabiehła kala 12,5 tysiačy rubloŭ. I heta ja nie liču tyja straty, jakija my panieśli praz sapsavanyja pradukty, kali my začynialisia na niekalki dzion», — raskazvaje Alaksandr Vałodzin, zasnavalnik MonkeyFood.
Kamanda mahła b sabrać hetyja hrošy, ale, na ich dumku, pravierki na hetym nie skončylisia b.
«Salidarnyja biełarusy adrazu pačali dapamahać nam finansava. Hetyja hrošy my zmahli pieranakiravać na zarobki supracoŭnikam. Ale adkryvacca, kab atrymlivać štrafy znoŭ i znoŭ i addavać zaroblenyja nami ci inšymi ludźmi hrošy dziaržavie, ja nie baču sensu. Jak i adkryvacca pad niejkim inšym brendam: my chacieli i chočam raźvivać tolki MonkeyFood, u hety brend układziena šmat vysiłkaŭ».
MonkeyFood byli ŭ Biełarusi adnymi ź pieršych, chto metanakiravana raźvivaŭ kulturu viehanskaha charčavańnia. Ciapier kamanda znachodzicca ŭ stanie likvidacyi jurydyčnaj asoby i raspradaje svajo abstalavańnie ŭ Biełarusi.
Sa svaim biznesam Alaksandr vymušany startavać u inšaj krainie.
«Dzie kankretna my adčynim novuju kropku MonkeyFood, pakul sakret. Ale mahu skazać, što my budziem staracca pieravieźci tudy svaich supracoŭnikaŭ. Ź liku tych, chto zachoča pajści na taki krok, bo ludzi dla nas samaje važnaje», — raspaviadaje Alaksandr.
Ën upeŭnieny, što vierniecca z hetym ža prajektam u Biełaruś, jak tolki situacyja tut źmienicca ŭ lepšy bok:
«Pakul heta ŭsio nahadvaje nacysckuju Hiermaniju ŭ časy, kali na kramach malavali žoŭtyja zorki. Tolki ŭ nas heta ałahičny čorny śpis na likvidavańnie. Niemahčyma pracavać u krainie, dzie ty abaviazany maŭčać, kab pracavać. My dakładna nie škadujem ab našym kroku, i, kali ŭsio adkrucić nazad, zrabili b usio toje samaje».
Haradzienski bar «Nieścierka»: Nam znoŭ kazali: «Vy ž sami ŭsio razumiejecie»
Historyja bara «Nieścierka» z Harodni — heta historyja pra toje, jak 10 siabroŭ adkryli miesca svajoj mary i nie pierasvarylisia. Raskazvaje adzin ź siabroŭ hetaha kalektyvu, dyrektar i suzasnavalnik bara, Źmicier Hałaś:
«U teatralny bar «Nieścierka» my chadzili jašče ŭ 2007-m, ź im źviazana šmat uspaminaŭ. A paśla nam ź siabrami pašancavała vykupić hetaje miesca i zrabić kancept, pra jaki my maryli. Chacia pačynałasia ŭsio z pustych ścien, jakija my prosta pafarbavali dy paviesili tudy karciny — vyhladała, nibyta stałoŭka. Tolki što padavali tam viehanskija burhiery i piva».
U bary «Nieścierka»
Z momantu adkryćcia ŭ 2016 hodzie ŭ «Nieściercy» prajšła vialikaja kolkaść viečaryn, kinapakazaŭ, vystaŭ, lekcyj. Mnohija zamiežnyja muzyki, dydžei pryjazdžali z vystupam u Harodniu tolki tamu, što mahli adyhrać set mienavita ŭ hetym kultavym miescy. Lubili jaho i turysty. Ciapier hetaha miesca bolš nie isnuje.
«Pačałosia ŭsio paśla 26 kastryčnika, kali my padtrymali ŭsieahulnuju zabastoŭku. Pry tym što raniej, u žniŭni, mahli zakryvać bar na paru hadzin, kab naviedać mirnyja demanstracyi. Litaralna praz paru dzion da nas pajšli pravierki: i sanstancyja, i pažarnaja inśpiekcyja, adździeł handlu. Ciaham dvuch tydniaŭ praviarajučyja orhany zavitvali prosta štodzień, my vypraŭlali adznačanyja parušeńni, ale na heta, zdajecca, navat nie źviartali ŭvahi», — zhadvaje Źmicier.
Abhruntavańnie pazapłanavych pravierak i znachodak niečakanych «parušeńniaŭ» byli ŭ lepšaj biełaruskaj tradycyi: «Vy ž sami ŭsio razumiejecie».
«Z ulikam abskardžvańnia častki štrafaŭ, nam treba było vypłacić dziaržavie 6210 rubloŭ. I hetuju sumu my mahli b pahasić, kali b kiraŭnictva abłasnoha dramteatra, na terytoryi jakoha my arendavali pamiaškańnie, nie vykinuła nas na vulicu: damova na arendu, jakaja dziejničała da 2022 hoda, była daterminova skasavanaja».
Usia kamanda ź siami čałaviek zastałasia biez pracy. Mnohija i pa siońnia ŭ pošukach. Pry hetym padobny los napatkaŭ i inšyja ŭstanovy ŭ Harodni: naprykład, začynilisia bary «Karyca» i «Łožak».
Źmicier adznačaje: jak tolki bar napatkali prablemy, ich adrazu zachlisnuła chvala salidarnaści:
«Nieścierka — viehanski bar, dzie daloka nie ŭsie katehoryi ludziej adčuvali siabie kamfortna. Ale jak tolki ŭ nas pačalisia pravierki i nas začyniali spačatku na paru dzion, da nas adrazu pajšli prapanovy z dapamohaj ad samych roznych ludziej. Navat miascovyja babuli zavitvali i prapanoŭvali dapamahčy hrašyma. I heta vielmi ciešyć: chaj my zhubili miesca, ale heta tolki pamiaškańnie. Znojdziem novaje. Prydbali my kudy bolš: cudoŭnych ludziej navokał i salidarnaść».
Surazmoŭca kaža, što jany nie hublajuć nadziei niekali znoŭ adčynić dźviery svajho bara. Praŭda, kali heta ździejśnicca, pakul nieviadoma.
«Ciapier nie samy lepšy čas dla adkryćcia novych miescaŭ navat z punktu hledžańnia pandemii, nie toje što palityčnaj paviestki. Ale my vielmi chočam adkrycca nanoŭ, dośviedu chapaje, žadańnia — taksama. Tym bolš, u horadzie, ščyra kažučy, amal nie zastajecca miescaŭ, dzie možna pajeści viehanam. Pierajazdžać niekudy asabista ja dakładna nie płanuju: tut moj dom».
O'Petit: Spadziajomsia znoŭ zapracavać viasnoj na tym samym miescy
Kaviarni O'Petit dastałosia jašče ŭ vieraśni, kali paśla čarhovaha niadzielnaha maršu tut raźbili šklanyja dźviery. Zrabiŭ heta ŭłasnaručna tahačasny kiraŭnik HUBAZiKa Mikałaj Karpiankoŭ, jaki z padnačalenymi sprabavaŭ patrapić unutr, kab zatrymać mirnych pratestoŭcaŭ, što schavalisia ŭ kafe.
Fota Onliner.by
Paśla pahromu, kab padtrymać uładalnikaŭ kaviarni, biełarusy stanavilisia ŭ vielizarnyja čerhi i skuplali tam kavu i desierty.
Kalektyŭ O'Petit taksama ŭziaŭ vychodny 26 kastryčnika, a ŭ śniežni zajaviŭ pra apošni pracoŭny dzień: «My zakryvajemsia na niavyznačany termin».
U kamientary «NN» uładalnik Uładzimir ścisła raspavioŭ, što jany buduć prykładać usie namahańni, kab usio ž adčynić svaje dźviery viasnoj:
«Akramia taho, što nam navypisvali štrafaŭ na 390 bazavych, my ŭsio adno abmiarkoŭvali zakryćcio, jašče raniej, bo klijentaŭ praz karanavirus stała mienš. Spadziajomsia tolki sami na siabie. Kali paciahniem dalej finansava, to viasnoj zapracujem».
Restaratar Uładź Łunievič: Budzie adkryćcio ŭstanovy ŭ Kijevie
Prajekty restaratara Uładzisłava Łunieviča ENZO, Simple, Let It Be, Underdog, Pizza place, «Łaŭka» i «Depo» taksama začynialisia paśla pravierak, što pasypalisia paśla taho samaha zabastovačnaha dnia.
Uładzisłaŭ Łunievič
Paźniej stała viadoma, što Uładź pieradaŭ kiravańnie imi «ŭ vydatnyja prafiesijnyja ruki ludziej, jakim daviaraje».
«Ja ŭsio hetak ža lublu Minsk, Kastryčnickuju, usie kafe i restaran, choć užo i nie maju da ich dačynieńnia», — tady koratka paviedamiŭ jon u sacyjalnych sietkach.
Ciapier Uładź znachodzicca va Ukrainie i ŭ kamientary «NN» raspavioŭ, što pracuje nad tym, kab adkryć novaje miesca ŭ Kijevie.
«Tut inšy rynak, inšyja ludzi, inšyja patreby. Ja raźbirajusia, vyvučaju taksama inšyja harady Ukrainy».
— Viartacca ŭ Biełaruś płanujecie?
— Abaviazkova chutka viarnusia, heta ž moj dom, jaki ja vielmi lublu! Ale pakul tut treba stavić biznes.
Svoj časovy adjezd Uładź patłumačyŭ «ciažkim niervovym stanam».
