Kanhres ZŠA admianiŭ vieta prezidenta Donalda Trampa, nakładzienaje na prajekt abaronnaha biudžetu krainy na 2021 finansavy hod, piša BBC.
Kab pryniać rašeńnie pa hetym pytańni, Sienat sabraŭsia 1 studzienia. Raniej anałahičnaje rašeńnie pryniała Pałata pradstaŭnikoŭ. Za admienu prahałasavaŭ 81 sienatar, suprać — 13. Nieabchodna było dźvie traciny hałasoŭ zakanadaŭcaŭ vierchniaj i nižniaj pałat Kanhresa.
U prajekt abaronnaha biudžetu na 2021 hod zakładziena 740 młrd dalaraŭ. Tramp, jaki nieŭzabavie sastupić svaju pasadu Džo Bajdenu, chacieŭ unieści źmieny ŭ niekatoryja pałažeńni prajekta, jakija tyčacca nacyjanalnaj biaśpieki. Jon nazvaŭ jaho padarunkam Rasii i Kitaju.
Trampu, u pryvatnaści, nie spadabałasia, što ŭ dakumiencie praduhledžvałasia abmiežavańnie na vyvad amierykanskich vojskaŭ z Afhanistana i jeŭrapiejskich krain, a taksama prapanova pierajmienavać niekatoryja vajskovyja bazy, nazvanyja ŭ honar vojenačalnikaŭ, jakija vajavali za rabaŭładalnicki poŭdzień padčas Hramadzianskaj vajny ŭ ZŠA.
«Na žal, hety zakon nie ŭklučaje ŭ siabie najvažniejšyja miery pa abaronie nacyjanalnaj biaśpieki, — skazaŭ Tramp. — U tym liku ŭ im jość normy, jakija nie prajaŭlajuć pavahi da našych vieteranaŭ, da našaj vajennaj historyi i supiarečać namieram administracyi addavać Amierycy pryjarytet u pytańniach nacyjanalnaj biaśpieki i źniešniepalityčnych dziejańniaŭ».
Taksama jon chacieŭ ŭnieści pałažeńnie ab adkaznaści sacsietak.
Pa amierykanskich zakonach, akty, jakija prymaje Kanhres, pavinien padpisać prezident. Kali amierykanski lidar nie zhodny z tym ci inšym zakonam, jon moža nakłaści na jaho vieta. Kali paśla hetaha zakonaprajekt znoŭ padtrymajuć dźvie traciny členaŭ abiedźviuch pałat Kanhresa, vieta ličycca pieraadolenym i jon ustupaje ŭ siłu.
Kali b Kanhres nie pieraadoleŭ vieta Tramp na zakon ab vajennych vydatkach, heta byŭ by pieršy vypadak za apošnija 60 hadoŭ, kali abaronny biudžet ZŠA nie ŭstupiŭ u siłu.
Śpikier Pałaty pradstaŭnikoŭ Nensi Pełasi, jakaja pradstaŭlaje Demakratyčnuju partyju, zajaviła, što vieta Trampa źjaŭlajecca prykładam dzivosnaha razhildziajstva, z-za jakoha ŭźnikaje pahroza biaśpiecy krainy, i demanstruje niepavahu da voli dvuchpartyjnaha Kanhresa.
