Žurnalistka Tut.by Kaciaryna Barysievič i siabra Kaardynacyjnaj rady Maryja Kaleśnikava, pryznanyja palitviaźniami, pieradali ŭ redakcyju partała, jak aceńvajuć vyniki svajho 2020 hoda.
Fota z sacsietak
— Kali b hod tamu mnie skazali, što 31 śniežnia ja budu ŭ prahułačnym dvoryku SIZA śpiavać «Usio budzie dobra» Vierki Siardziučki i pieśni z kinafilma «Ironija losu» — nie pavieryła b.
Siońnia hety scenar vielmi navat realistyčny. Jak kazaŭ Karatkievič, «kožny čałaviek nosić svajo nieba z saboj». Dla mianie važna ŭ luboj situacyi zastavacca čałaviekam, niahledziačy na dekłaracyi. I vieru, što nas usich uratuje pačućcio humaru. Navat tady, kali ty ŭ tupiku, i chočacca płakać. Tamu navat u SIZA jość miesca žartam, pieśniam, tancam, kniham i vieršam. A jašče ja dziakuju ŭsim za padtrymku, biełarusy — cudoŭnaja nacyja, — padahulniła svoj 2020-y Kaciaryna Barysievič.
Maryja Kaleśnikava kaža, što zapomnić hety hod na ŭsio žyćcio, amal kožny jaho dzień. Jak i bolšaść biełarusaŭ. Pa słovach Kaleśnikavaj, prymać składanyja rašeńni akazałasia vielmi lohka — kali ty viedaješ, što hetyja rašeńni pravilnyja. Vyśvietliłasia, što kazać praŭdu prosta, a być advažnym — naturalna dla biełarusa.
Fota Nadziei Bužan
— Ni my sami, ni režym navat u śnie nie mahli ŭbačyć, čym skončycca prezidenckaja kampanija hetaha hoda. My ŭsie damahlisia vynikaŭ, jakich nie damahalisia ŭsie papiarednija hady, ale našy hałoŭnyja ździajśnieńni jašče napieradzie. Dla ŭsioj prahresiŭnaj suśvietnaj supolnaści dziejučaja ŭłada bolš nie lehitymnaja. Ja vielmi spadziajusia, što biełarusy pamiatajuć pra svoj podźvih, što jany nie sumujuć i razumiejuć, što ŭsich nas čakaje vialikaja praca ŭ budučym hodzie. Hety hod byŭ nievierahodna nievierahodnym i nievierahodna składanym. Ź nieciarpieńniem čakaju nastupnaha, kab pahladzieć, što my, biełarusy, prydumajem dalej! U hetym hodzie my źmianilisia, i heta nazaŭždy, — padviała vyniki svajho 2020-ha Kaleśnikava.
