Ranicaj 23 śniežnia sud Maskoŭskaha rajona vynies prysud dvum bieraściejcam — 25-hadovamu Alaksandru i 32-hadovamu Michaiłu, jakija 9 žniŭnia brali ŭdzieł u akcyi pratestu. Ich asudzili pa č. 2 art. 363 KK RB (supraciŭ supracoŭnikam orhanaŭ unutranych spraŭ, źviazany z užyvańniem hvałtu abo z pahrozaj jaho prymianieńnia) na 3,5 i 3 hady kałonii ahulnaha režymu adpaviedna. Mienavita takoje pakarańnie prasiła dla ich dziaržabvinavaŭca, paviedamlaje Bresckaja hazieta.
Paciarpiełymi pa spravie byli dva supracoŭniki AUS, jakija na sudzie pakazańni davali źmienienymi hałasami z pakoja abarony śviedak.
Pavodle śledstva, viečaram 9 žniŭnia hrupa ź niekalkich maładych ludziej, jakija ŭdzielničali ŭ masavym mierapryjemstvie na praśpiekcie Mašerava, ździejśniła napad na supracoŭnikaŭ orhanaŭ unutranych spraŭ, jakija vykonvali słužbovyja abaviazki pa achovie hramadskaha paradku. Mužčyny nanosili im udary rukami i nahami pa roznych častkach cieła.
Na pieršym słuchańni spravy 21 śniežnia Alaksandr całkam pryznaŭ svaju vinu i zajaviŭ, što raskajvajecca.
Michaił vinu pryznaŭ častkova: jon ličyć, što prymianieńnia hvałtu nie było, była tolki jaho pahroza.
Pavodle viersii abvinavačvańnia, dvum supracoŭnikam AUS «pryčynienaja fizičny bol i maralnyja pakuty». Sami ž paciarpiełyja na sudzie zajavili, što aścierahalisia za svaju biaśpieku, pakolki siły byli nie roŭnyja: kala 50 supracoŭnikaŭ milicyi suprać bolš čym 1000 pratestoŭcaŭ.
