19 śniežnia ŭ minskim mikrarajonie Lebiadziny zatrymali troch mužčyn, jakija vyjšli na sustreču z susiedziami. Adnaho ź ich pavieźli ŭ RUUS razam ź dziećmi i paźniej adpuścili. Dvum inšym daviałosia pravieści vychodnyja na Akreścina. Siarod ich — i Mikałaj Šurkajeŭ, jakomu daviałosia pakinuć kalasku z 9-miesiačnym synam, kab prajechać ź siłavikami ŭ adździaleńnie, piša Tut.by.
Mikałaj Šurkajeŭ — baćka traich dziaciej, samamu małodšamu — usiaho dzieviać miesiacaŭ. Jak raspaviadała jaho žonka Iryna, muž vyjšaŭ ź dziciem na prahułku prykładna a 20 hadzinie. Skazaŭ, što nienadoŭha. Praz hadzinu ŭ dźviery patelefanavała susiedka i paviedamiła, što Mikołu zatrymali, a dzicia pavinny pryvieźci inšyja ludzi.
Spravu Mikałaja Šurkajeva razhladajuć u sudzie Centralnaha rajona Minska. Praces viadzie sudździa Dźmitryj Karsiuk. U zali — žonka Mikałaja Iryna, siabry, kalehi i advakat. Sam Mikałaj znachodzicca ŭ izalatary ŭ 1-m zavułku Akreścina i daje pakazańni pa videasuviazi.
Pra siabie Mikałaj Šurkajeŭ raspaviadaje: naradziŭsia ŭ 1981 hodzie, adukacyja — vyšejšaja, pracuje dyrektaram kampanii. Razam z žonkaj jany vychoŭvajuć traich dziaciej: starejšaj dačce 11 hadoŭ, siaredniamu synu 7 hadoŭ, małodšamu — 9 miesiacaŭ.
Pa pratakole milicyi, 19 śniežnia, u pieryjad z 20.50 da 21.00, jon znachodziŭsia kala doma na praśpiekcie Pieramožcaŭ, 127 i naŭmysna parušyŭ Zakon Ab masavych mierapryjemstvach.
Z pratakołam Mikałaj nie pahadziŭsia i rastłumačyŭ: u hety čas jon viartaŭsia z prahułki z synam i ruchaŭsia ŭ bok «Vitalura».
Mikałaj zajaviŭ ab dvuch chadajnictvach. Pieršaje — dałučyć da materyjałaŭ spravy pratakoł ahladu rečaŭ inšych zatrymanych. Druhoje — źviarnuć uvahu, što ŭ rukach u jaho była kalaska, jakuju śviedka nie zaŭvažyŭ, a heta maksimalna bačnaja detal.
Paśla nievialikaha pierapynku sudździa Dźmitryj Karsiuk vynies rašeńnie: pryznać Mikałaja vinavatym i pryznačyć štraf u pamiery 810 rubloŭ.
