U prezidenta Rasii Uładzimira Pucina niama nijakich bunkieraŭ. Pra heta zajaviŭ pres-sakratar kiraŭnika dziaržavy Dźmitryj Piaskoŭ u efiry radyjo «Kamsamolskaja praŭda», piša RBK.
kremlin.ru
«Vy sami bačycie. što nijakich bunkieraŭ niama. I taki aktyŭny kiraŭnik dziaržavy, jak Pucin, nie moža siadzieć ni ŭ jakim bunkiery», — skazaŭ jon.
Na minułym tydni Piaskoŭ užo abviarhaŭ paviedamleńni, što ŭ pandemiju Pucin staŭ žyć u śpiecyjalnym bunkiery. Pa słovach Piaskova, prezident žyvie ŭ Nova-Aharovie, dzie jon žyŭ i da pandemii. Časam jon pryjazdžaje ŭ Kreml abo adpraŭlajecca ŭ kamandziroŭki.
Raniej vydańnie «Prajekt», spasyłajučysia na krynicy i źviestki ab palotach samalota kiraŭnika dziaržavy, pisała, što niahledziačy na aficyjnyja zajavy ab tym, što Pucin pracuje ŭ rezidencyi ŭ Nova-Aharovie, jon znachodzicca ŭ rezidencyi ŭ Sočy. Surazmoŭcy vydańnia kazali, što tak ułady sprabujuć zymitavać blizkaść prezidenta i hramadzian u pieryjad abmiežavańniaŭ z-za karanavirusa.