Druhi hod zapar biudžet u Biełarusi płanujecca deficytnym paśla šaści praficytnych hadoŭ, pryčym razryŭ pavialičycca nie tolki ź pieršapačatkova zapłanavanym uzroŭniem 2020 hoda, ale i, chutčej za ŭsio, z faktyčnym. Vydatki respublikanskaha biudžetu vyrastuć u paraŭnańni z 2020-m hodam, dachody — skarociacca. Prajekt zakona ab biudžecie na 2021 hod apublikavaŭ u piatnicu Minfin, piša Tut.by
Respublikanski biudžet na 2021 hod pa vydatkach zaćvierdžany ŭ sumie 27,351 młrd rubloŭ (+7,6%) zychodziačy z prahnazujemaha abjomu dachodaŭ u sumie 23,304 młrd rubloŭ (minus 4,6%). Pamier deficytu respublikanskaha biudžetu na 2021 hod u sumie 4 mrłd rubloŭ (u hetym hodzie jon mianiaŭsia ź pieršapačatkovych 1 młrd da 2,6 młd rubloŭ, pavodle apošnich acenak). Krynicy jaho finansavańnia — reštki minułych hadoŭ i źniešnija resursy, kredyty i raźmiaščeńnie dziaržaŭnych papier.
U dachodach biudžetu Minfin čakaje skaračeńnia pastupleńnia padatku na prybytak na 40% u paraŭnańni ź pieršapačatkovymi čakańniami na 2020 hod (983 młn rubloŭ), a voś pastupleńni ad PDV vyrastuć na 13% da 10,4 młrd rubloŭ. Siarod niepadatkovych dachodaŭ dachody ad vykarystańnia majomaści, jakaja znachodzicca ŭ dziaržułasnaści (u asnoŭnym heta dyvidendy pa akcyjach i dachody ad inšych formaŭ udziełu ŭ kapitale) skarociacca bolš čym u 2 razy da 1 młrd rubloŭ.
U 2021 hodzie płanujecca rezki, na 30% da 1,7 młrd rubloŭ, rost vydatkaŭ respublikanskaha biudžetu na achovu zdaroŭja. Pry hetym vydatki na nacyjanalnuju abaronu vyrastuć na 10,8% da 1,463 młrd rubloŭ, a vydatki na ŚMI i zusim skarociacca na 4,9% da 156 młn rubloŭ.
Nahadajem, pa vynikach 10 miesiacaŭ Minfin paviedamlaŭ, što ŭ biudžecie adčuvajecca «peŭny niedabor dachodaŭ», i pa vynikach hoda niedabor składzie 2,5−3 młrd rubloŭ. Pryčynaj vypadzieńnia dachodaŭ stała ŭ liku inšaha zapavoleńnie ekanomiki ŭ druhim i trecim kvartale ŭ suviazi z karanavirusnaj infiekcyjaj, što adbiłasia na prybytkovaści arhanizacyj.
Akramia taho, u pieršym kvartale byli «peŭnyja składanaści z pastaŭkami nafty». Takim čynam, jość niedapastupleńnie pa hetych płaciažach.
Pakolki rezkaha spynieńnia pandemii nie čakajecca, prykmietnaha rostu pastupleńniaŭ i ŭ pačatku 2021 hoda Minfin nie čakaje
