Pavał Doŭnar.
Prakuratura Centralnaha rajonu Miensku dasłała himnazii № 23 pradpisańnie pravieści sacyjalnaje raśśledavańnie ŭ dačynieńni siamji Doŭnaraŭ, piša Radyjo Svaboda.
Siamju mohuć pastavić na ŭlik, bo dačka-druhaklaśnica nibyta znachodzicca ŭ sacyjalna niebiaśpiečnym stanoviščy. Nijakich uciamnych pryčyn i dakumentaŭ baćkam nie pakazali. Niahledziačy na šmatlikija pravierki i rady prafilaktyki, sprava jašče nie zavieršanaja.
Svaboda pahavaryła z Paŭłam Doŭnaram.
«Patelefanavała žančyna, jakaja nazvałasia ŭčastkovym inspektaram Nadziejaj Ivanovaj»
Pavał Doŭnar i Karyna Adziesienka — zasnavalniki i dyzajnery adzieńnia Honar. U siamji hadujecca 8-hadovaja dačka, jakaja vučycca ŭ biełaruskamoŭnaj himnazii № 23.
Paŭtara miesiaca tamu Paŭłu Doŭnaru patelefanavali sa schavanaha numaru. Žančyna, jakaja telefanavała, nazvałasia ŭčastkovym inspektaram Centralnaha RUUS Nadziejaj Ivanovaj. Proźvišča padałosia Paŭłu dziŭnym.
«Kali ja zapytaŭsia, a jak pa baćku, žančyna vytrymała paŭzu i skazała, što Ivanaŭna. Jana zaprasiła mianie na razmovu. Ja zapytaŭsia, ź jakoj nahody, moža, štości raśśledujuć. Ničoha źviaznaha i kankretnaha nie adkazała. Ja paprasiŭ dasłać pozvu. Jana zapeŭnivała: nibyta słali, mabyć, pozva nie dajšła. Ale ja nastojvaŭ na poźvie, i jana razdražniona zavieršyła razmovu słovam «Chorošo»».
Potym da siamji Doŭnaraŭ pryjšli pradstaŭniki škoły, da terytoryi jakoj jany adnosiacca pavodle miesca žycharstva, choć dačka vučycca ŭ inšaj ustanovie — 23-j biełaruskamoŭnaj himnazii na płoščy Jakuba Kołasa. Doŭnary ździvilisia i spytali, jakoje dačynieńnie jany majuć da toj škoły.
«Nijakich dakumentaŭ nam nie pakazali. Kali ja zapytaŭsia, u čym nas vinavaciać, u čym prablema, mnie adkazali, što mohuć nadać siamji status «sacyjalna niebiaśpiečnaha stanovišča» (SNS) — prakuratura Centralnaha rajonu vydała pradpisańnie pravieści sacyjalnaje raśśledavańnie.
Ja ŭvažliva pračytaŭ pastanovu Savietu Ministraŭ № 22. Navat kali nam chacieli «pryšyć» niejkija palityčnyja pohlady, tam takoha niama. Siamju mohuć pastavić na ŭlik, kali tam hvałt, dzicia nie dahladajuć, nia kormiać. To bok za palityčnyja pohlady nu nijak nia mohuć prypisać SNS.
Nam paviedamili, što nibyta jość niejki fatazdymak našaha ŭdziełu ŭ akcyi. Ale ničoha nie pakazali, navat nie skazali, u jakich sietkach toj fatazdymak. Ale heta moža być i fatašop. Na maju dumku, kali jość zdymak, jaho pavinien acanić ekspert», — razvažaje Pavał Doŭnar.
Daviedka Svabody:
Pavodle zakonu, jość try asnoŭnyja krytery, kali stanovišča dziaciej moža być pryznana sacyjalna niebiaśpiečnym. Try ŭmovy dakładna apisanyja ŭ pastanovie Savietu Ministraŭ ad 15 vieraśnia 2019 hodu № 22 «Ab pryznańni taho, što dzieci znachodziacca ŭ sacyjalna niebiaśpiečnym stanoviščy»:
- kali baćki nie zadavalniajuć asnoŭnych žyćciovych patrebaŭ dziciaci (dziaciej nia kormiać, u siamji drennyja žyllovyja ŭmovy)
- kali baćki nie zabiaśpiečvajuć nahladu za pavodzinami dziaciej i jany ŭčyniajuć pravaparušeńni ci złačynstvy;
- kali baćki viaduć amaralny ład žyćcia ci žorstka abychodziacca ź dziećmi.
Dziaržaŭnyja orhany (upraŭleńnie adukacyi, kamisija spravaŭ niepaŭnaletnich, vykankamy, škoła, dziciačy sadok dy inšyja) vyjaŭlajuć takija siemji, pravodziać sacyjalnaje raśśledavańnie, prymajuć pastanovu, układajuć plan zachadaŭ, jakija naležyć pravieści ź siamjoj, kantralujuć ich vykanańnie — pracedura padrabiazna apisanaja ŭ pastanovie ŭradu. «Na jakoj padstavie źbirajuć našy asabistyja źviestki?»
Pavał aburajecca, što niejkaja kamisija źbiraje asabistyja źviestki jahonaj siamji.
«Cełaja kamisija praviaraje apłatu kamunalnych pasłuh, nakiroŭvaje zapyty ŭ palikliniku, u milicyju — ci byli administracyjnyja štrafy, šukaje kampramat. Na jakoj padstavie jany źbirajuć našy asabistyja źviestki?» — ździŭlajecca spadar Doŭnar.
Potym pryjšoŭ list užo z himnazii, dzie nie paznačana imia dziciaci. A što tyčycca maci dziaŭčynki, tam naahuł inšaje imia i proźvišča, niejkaja «spadarynia Karol», praciahvaje Pavał.
«Da nas u dom pryjšła kamisija z himnazii. Sami nastaŭniki dziejničali na zahad dyrektarki. U našym vypadku my prosta pahavaryli, jany zapoŭnili papierki, što ŭsio dobra, i syšli.
Sprabavała pryjści jašče i milicyja, ale atrymałasia śmiešnaja historyja. U nas vialiki sabaka — aŭčarka, jon taki hučny, hałasisty. Pryjšli pad dźviery 5 milicyjantaŭ, pačuli brech i sami kažuć: «Tut milicyja, nie adčyniajcie» i trymali dźviery», — z uśmieškaj apaviadaje Pavał.
«Ja nia viedaju, jakaja padstava. Miarkuju, byŭ niejki zahad»
16 śniežnia Paŭła i Karynu zaprasili ŭ himnaziju na pasiedžańnie «rady prafilaktyki bieznahladnaści i pravaparušeńniaŭ siarod niepaŭnaletnich» — mienavita tak zvaŭsia hety orhan. Prysutničali 7 čałaviek — niapoŭny skład. Udzielniki prasili prabačeńnia, što niekalki čalcoŭ rady chvarejuć na karanavirus.
«Nichto nie nazvaŭsia. Niekalki čałaviek ja viedaŭ — pedahohi z himnazii. Astatnich ja nia viedaŭ, moža, tam była i «Nadzieja Ivanaŭna Ivanova» — biaz formy. Apaviadali nam žachi — jak dziaciej tapili ŭ vańnie, pakazvali niejkija žudasnyja fatazdymki. Ichnaja lohika — mienavita tamu i my znachodzimsia tut.
Ja pažartavaŭ, što nielha źbiracca takoj hramadoj, zaraz ža karanavirus. I naahuł, maŭlaŭ, padzialiciesia na trojki i prymajcie rašeńnie adrazu rasstrelvać baćkoŭ, kab nie było sacyjalna niebiaśpiečnaha stanovišča ni ŭ baćkoŭ, ni ŭ dziaciej.
Karaciej, šmat demahohii, pierakručvańnia, ščyraj razmovy nie atrymałasia. Ničoha nie pakazali — za što ž nas vyklikali i ŭ čym padazrajuć.
Ja ščyra kažu: nia viedaju, jakaja padstava. Miarkuju, byŭ niejki zahad. Jany kazali: heta prafilaktyčnaja hutarka. Maŭlaŭ, «sami možacie chadzić kudy zaŭhodna, tolki dziaciej nie vadzicie».
Ja kažu: davajcie škoła budzie zajmacca navučańniem, a nie nieviadoma čym». Jany nibyta i pahadžajucca: «Tak, ale my dziaržaŭnaja ŭstanova», — raskazaŭ pra pasiedžańnie rady prafilaktyki bieznahladnaści i pravaparušeńniaŭ siarod niepaŭnaletnich Pavał Doŭnar.
Na pasiedžańni rady paviedamili, što razbor praciahniecca pavodle jašče adnaho lista, jaki jany pakul nie atrymali, to bok heta jašče nie finał.
