BiełTA
Deputaty Pałaty pradstaŭnikoŭ pryniali ŭ pieršym čytańni zakonaprajekt «ab dziaržaŭnaj słužbie», dakumient pradstaviła ministr pracy i sacyjalnaj abarony Iryna Kaścievič, piša BieŁTA
Pavodle jaje słoŭ, hałoŭnaja meta pieraŭtvareńniaŭ — pavyšeńnie efiektyŭnaści dziaržaŭnaha kiravańnia. «Nieabchodna stvaryć umovy, pry jakich u sistemu dziaržaŭnych orhanaŭ prychodzili b nie vypadkovyja ludzi na karotkaterminovy pieryjad, a vysokaprafiesijnyja, talenavityja ŭpraŭlency, jakija majuć šyroki kruhahlad i vialiki patencyjał, zdolny vyznačać stratehičnyja zadačy i pryjarytety, aceńvać nastupstvy rašeńniaŭ, što prymajucca», — padkreśliła Iryna Kaścievič.
U prajekcie zakona, u pryvatnaści, zamacoŭvajecca cełasnaja sistema dziaržaŭnaj słužby, jakaja składajecca ź dziaržaŭnaj cyvilnaj słužby, vajskovaj słužby, słužby ŭ vajenizavanych arhanizacyjach.
«Vyznačeńnie adzinaj sistemy dziaržaŭnaj słužby budzie sadziejničać likvidacyi supiarečnaściej u pravavym rehulavańni, a taksama zakładzie fundamient dla zbližeńnia i vypracoŭki ŭnifikavanych padychodaŭ u rehłamientacyi roznych vidaŭ dziaržaŭnaj słužby.
Dla zabieśpiačeńnia adzinstva dziaržaŭnaj słužby praduhledžany ahulnyja dla ŭsich dziaržaŭnych słužačych normy, jakija vyznačajuć pryncypy dziaržaŭnaj słužby i paniaćci. Uvodzicca rejestr dziaržaŭnych cyvilnych pasad i ŭdaskanalvajecca isnujučaja sistema kłasaŭ dziaržaŭnych słužačych», - dadała ministr.
Rejestr daść mahčymaść dyfierencyravać cyvilnyja pasady i adpaviednuju im apłatu pracy ŭ zaležnaści ad uzroŭniu dziaržaŭnaha orhana, uskładzienych na cyvilnaha słužačaha paŭnamoctvaŭ, uzroŭniu kvalifikacyi, stažu cyvilnaj słužby. U hetych metach budzie padrychtavany prajekt ukaza ab dziaržaŭnych cyvilnych pasadach.
Praduhledžvajecca taksama ŭzmacnieńnie dyscypliny i adkaznaści cyvilnych słužačych u metach zbližeńnia ich pravavoha statusu z vajennasłužačymi.
«U pryvatnaści, vyznačajecca paniaćcie słužbovaj dyscypliny cyvilnych słužačych i sposaby jaje zabieśpiačeńnia pa anałohii z patrabavańniem voinskich statutaŭ i statutaŭ vajenizavanych arhanizacyj, zamacoŭvajucca ahulnyja patrabavańni da etyčnych pavodzin cyvilnych słužačych pa anałohii z pałažeńniami dziejučych dyscyplinarnych statutaŭ, jakija raspaŭsiudžvajuć svajo dziejańnie jak na słužbovyja pavodziny, tak i na pavodziny ŭ bycie. Dla hetych met u jakaści dadatku da zakona raspracavany ahulnyja patrabavańni słužbovaj etyki dziaržaŭnych cyvilnych słužačych. Nievykanańnie patrabavańniaŭ słužbovaj etyki pryviadzie da prymianieńnia da cyvilnaha słužačaha mier dyscyplinarnaha ŭździejańnia», — adznačyła Iryna Kaścievič.
