Pradstaŭniki biełaruskaj demakratyčnaj supolnaści siońnia ŭ Bruseli atrymali premiju «Za svabodu dumki» imia Andreja Sacharava za 2020 hod. Uračystaje ŭručeńnie ŭznaharody adbyłosia ŭ sieradu na plenarnaj siesii Jeŭraparłamienta.
«Dla mianie vialiki honar uručyć premiju imia Sacharava 2020 hoda demakratyčnaj apazicyi Biełarusi i vitać Śviatłanu Cichanoŭskuju i jaje kaleh-łaŭreataŭ tut, u Jeŭraparłamiencie. Siońnia my addajom daninu ich mužnaści i sile», — skazaŭ kiraŭnik JEP David Sasoli na ŭručeńni premii, padkreśliŭšy, što «abaviazak ES — padtrymać narod Biełarusi ŭ jaho imknieńni da demakratyi».
Sioletnimi łaŭreatami premii stali inicyjatary Kaardynacyjnaj rady, Śviatłana Cichanoŭskaja i piśmieńnica Śviatłana Aleksijevič, a taksama aktyvistki Maryja Kaleśnikava (jaje pradstaŭlała jaje siastra Taćciana Chomič), Volha Kavalkova, Vieranika Capkała. U lik łaŭreataŭ taksama ŭvajšli Siarhiej Cichanoŭski, Aleś Bialacki, Siarhiej Dyleŭski, Ściapan Puciła i Mikałaj Statkievič.
Biełarusy ŭžo atrymlivali premiju Sacharava ŭ 2004-m i 2006-m hadach (Biełaruskaja asacyjacyja žurnalistaŭ i Alaksandr Milinkievič).
