Baskietbalistka Alena Leŭčanka, što ŭ kastryčniku adsiadzieła 15 sutak na Akreścina, u intervju Youtube-kanału «ČiestnOK» prakamientavała situacyju ź Mis Biełarusi-2008 Volhaj Chižynkovaj, jakaja amal užo 40 sutak praviała na Akreścina.
«Heta biesčałaviečna, bo sud prosta prachodzić i naohuł nichto ničoha nie viedaje. Bo ŭ kožnaha, chto pracuje na Akreścina, jość siemji, jość dzieci, jość baćki, mužy, žonki. Možna ž elemientarna patelefanavać. Niachaj nie rodnym, ale choć by advakatu. Bo vy viedajecie, što ludzi buduć stajać i čakać.
Upeŭnienaja, jany čytajuć usie sacyjalnyja sietki, usie telehram-kanały. Hetaja sistema śpiecyjalna sprabuje nasalić, ukusić, zrabić baluča i niepryjemna. Ale čałaviek siadzić užo taki vialiki čas, jana ž dziaŭčyna», — skazała Leŭčanka.
Volha Chižynkova była zatrymanaja 8 listapada padčas akcyi pratestu, praz try dni joj prysudzili 12 sutak aryštu. Potym dadali jašče 15 i 15 sutak za dźvie raniejšyja akcyi.
