Fota Jaŭhienija Jarčaka
Sud u Starych Darohach razhledzieŭ administracyjnuju spravu pa artykule 23.34 (Udzieł u niesankcyjanavanym mierapryjemstvie), jakuju milicyja zaviała ŭ dačynieńni da Vadzimira Zarankina, starejšaha syna mera Viciebska. Jamu dali 10 sutak administracyjnaha aryštu. Nahadajem, Zarankina zatrymali jašče 12 kastryčnika kala kramy «Ryha», piša Tut.by.
U mera Viciebska Vadzima Zarankina dva syny: 32-hadovy Vadzimir i 28-hadovy Filip. Braty žyvuć u Minsku, zakončyli staličnyja VNU, abzavialisia siemjami. Chłopcy nie chavajuć, što vystupajuć za pieramieny ŭ krainie, niahledziačy na toje, što ich baćka — vysokapastaŭleny čynoŭnik. Jašče ŭ vieraśni sud pakaraŭ Filipa, małodšaha syna, administracyjnym aryštam za ŭdzieł u maršy suprać inaŭhuracyi Alaksandra Łukašenki. Chłopiec śćviardžaje, što ŭ akcyi nie ŭdzielničaŭ, a išoŭ dadomu z pracy.
A 12 kastryčnika siłaviki zatrymali starejšaha z bratoŭ — Vadzimira. Kala kramy «Ryha», kudy Vadzimir pryjechaŭ za pakupkami, jaho vyciahnuli prosta z-za rula aŭtamabila, dastavili ŭ RUUS, a potym u Žodzina.
Amal praz dvoje sutak tam ža prajšoŭ sud pad staršynstvam sudździ sa Starych Daroh. Na pasiadžeńnie nie vyklikali advakata Zarankina, chłopiec padavaŭ pra heta chadajnictva, tamu sudździa pieraniesła razhlad spravy. Vadzimira adpuścili z abaviazacielstvam ab jaŭcy.
Nastupnaje pasiadžeńnie pavinna było adbycca ŭ kancy kastryčnika ŭ sudzie Starych Daroh. Adnak jano znoŭ nie adbyłosia. Sudździa zapytała źviestki pra śviedku — supracoŭnika RUUS Savieckaha rajona Minska pad vydumanym imiem, a paśla taho jak atrymała adkaz, što taki supracoŭnik u RUUS nie pracuje, viarnuła materyjał na dapracoŭku z zapisam: «Pakolki prymianieńnie mier biaśpieki da śviedki nie praduhledžanyja PVKaAP Respubliki Biełaruś, nazvanyja abstaviny pieraškadžajuć razhladu spravy ŭ sudovym pasiadžeńni».
Słuchańnie pieranieśli na 7 śniežnia — za piać dzion da zakančeńnia terminu nakładańnia. Na hety raz spravu razhladała staršynia suda.
— Na pasiadžeńnie ja pryjechaŭ z advakatam i dvuma śviedkami. Bačačy, jak u apošni čas prachodziać našy sudy, ja byŭ hatovy da luboha vyniku spravy. Ale ŭsio ž krychu spadziavaŭsia dakazać, što nie «braŭ udziełu ŭ šeści», jak heta było paznačana ŭ pratakole, — raspavioŭ Vadzimir Zarankin.
Śviedka z boku milicyi vystupaŭ praz Skype, pa-raniejšamu davaŭ pakazańni pad vydumanym proźviščam — Hromaŭ. Jon nazvaŭsia ŭčastkovym milicyjanieram Savieckaha RUUS. Jaho danyja praviarała sudździa, na hety čas jana paprasiła vyjści z kabinieta Zarankina i jaho advakata.
Advakat Zarankina akcentavaŭ uvahu na tym, što ŭ Biełarusi zakonam ustanoŭleny asablivy paradak źmieny piersanalnych źviestak dla rabotnikaŭ pravaachoŭnych orhanaŭ, jaki nie praduhledžvaje źmianieńnie źviestak pra asobu rapartam milicyjanta, jak heta adbyłosia ŭ spravie Zarankina. Adnak sud praihnaravaŭ heta i paličyŭ pakazańni śviedki dapuščalnymi i dakładnymi.
— Milicyjant zapeŭnivaŭ, što asabista bačyŭ mianie a 20.30 z adlehłaści nie bolš za 15 mietraŭ. Maŭlaŭ, ja byŭ na šeści ź inšymi ludźmi, «paznačanymi charakternaj simvolikaj». Jon pahladzieŭ na moj tvar i skazaŭ, što dobra mianie pamiataje. Tolki voś zabyŭsia, dzie znachodziŭsia ŭ hety čas sam, chacia b prykładna.
U abaronu Vadzimira vystupili śviedki, byli prahledžanyja 12 videa z kamier vonkavaha nazirańnia HC «Ryha», a taksama raźmieščanych u domie Zarankina, na jakich było vidać, što chłopiec u 22.00 vychodziŭ z ułasnaha doma, a ŭ 22.30 znachodziŭsia la ŭvachodu ŭ HC «Ryha». Pry hetym nijakaha šeścia i «paznačanych charakternaj simvolikaj» ludziej vakoł nie było.
— Maje źviestki pakazvali na nieadpaviednaści ŭ pratakole: pačynajučy ad času zatrymańnia i zakančvajučy tym, što paśla 22.00, kali ja byŭ na Surhanava, pratesnych akcyj tam nie było.
Pasiadžeńnie išło kala dźviuch hadzin. U vyniku sudździa abviaściła, što znoŭ pieranosić pasiadžeńnie — u spravie nie chapaje vypiski ab administracyjnych parušeńniach Zarankina.
Učora, 9 śniežnia, pasiadžeńnie praciahnułasia. Na im začytali źviestki ab niekalkich parušeńniaŭ Vadzimira za pieravyšeńnie chutkaści. A potym, navat nie addalajučysia ŭ daradčy pakoj, sudździa abviaściła pakarańnie: 10 sutak administracyjnaha aryštu. Z hetaha terminu treba adniać amal dvoje sutak, jakija chłopiec adsiedzieŭ u žodzinskaj turmie.
— Nadzieja, što mianie apraŭdajuć, była nie vielmi vialikaja, ale majučy takuju dokaznuju bazu ŭ svaju abaronu, na aryšt ja nie raźličvaŭ. Tym bolš, amal usim, kaho ŭ Žodzinie sudzili adnačasova sa mnoj pa identyčnych pratakołach, davali štraf 5-10 bazavych. Atrymlivajecca, što adno słova śviedki-inkohnita pierakreślili ŭsie maje dokazy.
U Zarankina jość piać dzion na padaču skarhi na rašeńnie pa spravie suda Starych Daroh u Minski abłasny sud. Chłopiec maje namier skarystacca hetym pravam. Tym nie mienš, Vadzimir ciapier budzie nasić z saboj «tryvožny čamadančyk», bo nie vyklučaje vierahodnaści taho, što jašče da pierahladu spravy jaho mohuć zatrymać i źmiaścić u kamieru dla adbyćcia aryštu.
