9 śniežnia kiraŭniki dypłamatyčnych misij ES i dziaržaŭ — siabraŭ ES, pradstaŭlenych u Minsku, Vialikabrytanii, Šviejcaryi i ZŠA sustrelisia ź ministram zamiežnych spraŭ Biełarusi Uładzimiram Makiejem, paviedamlaje sajt pradstaŭnictva ES.
Dypłamaty spytalisia ab płanach biełaruskich uładaŭ u dačynieńni da vykanańnia patrabavańniaŭ Kanstytucyi krainy i mižnarodnych abaviazacielstvaŭ, jakija tyčacca fundamientalnych pravoŭ i svabod, a taksama viaršenstva prava, što, u pieršuju čarhu, vyjaviłasia b u nastupnym:
— spynieńni zatrymańniaŭ, hvałtu i biesčałaviečnaha abychodžańnia ź mirnymi pratestoŭcami;
— vyzvaleńni ŭsich palityčnych źniavolenych i niespraviadliva zatrymanych;
— sudovym pieraśledzie tych, chto sankcyjanavaŭ i ŭčyniaŭ akty hvałtu i biesčałaviečnaha abychodžańnia, jakija pryviali da ranieńniaŭ, traŭmaŭ, hibieli ludziej i farmavańnia ahulnaj atmaśfiery biezzakonnaści;
— praviadzieńni svabodnych i spraviadlivych vybaraŭ pad niezaležnym nazirańniem.
Dypłamaty taksama prainfarmavali ministra ab mahčymych scenarach, pa jakich mahli b raźvivacca adpaviednyja dvuchbakovyja adnosiny, kali b ułady Biełarusi raspačali adčuvalnyja i značnyja kroki pa adnaŭleńni viaršenstva prava.
Kiraŭniki misij zaklikali ŭłady Biełarusi ŭstrymlivacca ad dziejańniaŭ, jakija pieraškadžajuć dypłamatyčnaj supolnaści ŭ vykanańni svaich standartnych dypłamatyčnych abaviazkaŭ u atmaśfiery, svabodnaj ad umiašańnia i zapałochvańnia. Jany taksama čakajuć, što biełaruski bok pahodzicca na viartańnie ŭ Biełaruś pasłoŭ Litvy i Polščy i ich štatu dypłamatyčnych supracoŭnikaŭ da kanca hoda.
Dypłamaty paŭtaryli, što ich urady hatovyja akazvać padtrymku i sadziejničać inkluziŭnamu nacyjanalnamu dyjałohu ŭ Biełarusi, abaraniajučy suvierenitet i niezaležnaść Biełarusi, a taksama jaje biaśpiečnuju, demakratyčnuju i kvitniejučuju budučyniu.
MZS Biełarusi ab sustrečy nie paviedamiŭ.
