U vypusku debataŭ «DysKUT» ekanamist Siarhiej Čały i pradstaŭnik Śviatłany Cichanoŭskaj pa ekanamičnych reformach Aleś Alachnovič tłumačać, jakija reformy spatrebiacca Biełarusi najpierš z prychodam novaj ułady.
«Hałoŭnaja prablema nieefiektyŭnaści biełaruskaj ekanomiki — heta nieefiektyŭnaje raźmierkavańnie resursaŭ, pryčyna jakoha ŭ najaŭnaści nierefarmavanaha jašče z savieckich časoŭ dziaržaŭnaha siektara. Reforma pavinna adnačasova i skaracić jaho, i pavialičyć efiektyŭnaść tych pradpryjemstvaŭ, jakija zastanucca. My musim pazbavicca ad skrytaha biespracoŭja — tych rabotnikaŭ, jakija vyrablajuć toje, što rynku niepatrebna», — kaža Siarhiej Čały.
Jon akcentuje, što dla pačatku hetaj reformy nieabchodnyja pieradumovy.
«Ciapierašniaja sistema sacyjalnaj abarony nasielnictva, jakaja paśpiachova spraŭlajecca z abaronaj ludziej niepracazdolnych, amal ničoha nie zmoža prapanavać ludziam, jakija buduć hublać pracu ŭ vyniku aptymizacyi kolkaści zaniatych na pradpryjemstvach. Taja dapamoha pa biespracoŭju, jakaja jość zaraz, jana prosta śmiešnaja. I chutčej za ŭsio mienavita heta strymlivaje lubyja sproby pačać reformu hetych samych pradpryjemstvaŭ. To-bok nieabchodna istotnaje padvyšeńnie dapamohi pa biespracoŭju, mahčyma, navat zachavańnie na praciahu paŭhoda zarobku z pastupovym źmianšeńniem. Inačaj my atrymajem vielizarny ŭsplosk biednaści», — tłumačyć Čały.
Aproč taho, jon adznačaje biezumoŭnuju važnaść adnaŭleńnia roŭnaści formaŭ ułasnaści pierad zakonam, kali sudy nie zvažajuć na toje, pradstaŭnik dziaržpradpryjemstva padaje pozvu na pryvatnika ci pryvatnik na dziaržpradpryjemstva.
Daradca Cichanoŭskaj pa ekanamičnych reformach Aleś Alachnovič bačyć jašče šerah nieabchodnych krokaŭ pa refarmavańni ekanomiki.
«Adzin z tych barjeraŭ, jakija adznačaje biznes, aproč viaršenstva zakonu i niedavieru da dziaržavy ŭ cełym, — heta adsutnaść makraekanamičnaj stabilnaści. Jość taksama prablema ź finansavymi resursami. Na siońnia ŭ Biełarusi ŭ biznesaŭ, jakija chacieli b raźvivacca, unutranych srodkaŭ mała, patrebnyja pazyki, a jany davoli darahija. Kab palehčyć umovy dla biznesu ŭ Biełarusi, treba supracoŭničać ź mižnarodnymi finansavymi instytutami, znachodzić hrantavaje finansavańnie dla raźvićcia pryvatnaha biznesu. I my heta možam usio rabić — novaja Biełaruś zmoža heta zrabić», — kaža Aleś Alachnovič.
Taksama jon ličyć, što nieabchodna pavialičyć niezaležnaść Nacbanka.
«Kab toje, što robić Nacbank, nie zaležała ad adnoj asoby. Bo siońnia kiraŭnik dziaržavy moža ŭ luby momant zvolnić kiraŭnika Nacbanka — i ŭsio toje dobraje, što robić Nacbank, moža ŭmomant źniknuć. Hetaja niezaležnaść musić być prapisanaja ŭ Kanstytucyi, kiraŭnik Nacbanka pavinien abiracca parłamientam. Dziakujučy hetamu možna budzie zabiaśpiečyć makraekanamičnuju stabilnaść», — miarkuje Alachnovič.
Hladzicie bolš na jutub-kanale debataŭ «DysKUT»
