Vykliki, što stajać pierad biełaruskimi daktarami, abmierkavali terapieŭt Darja Čechava, a taksama aniestezijołah-reanimatołah Nika Siachovič u vypusku debataŭ «DysKUT».
Darja Čechava da niadaŭniaha času pracavała doktarkaj u pryjomnym adździaleńni 10-j haradskoj kliničnaj balnicy. Usiu pandemiju jana dzialiłasia svaimi nazirańniami ab COVID-19 i taktycy biełaruskaha Ministerstva achovy zdaroŭja ŭ pytańni baraćby z hetym zachvorvańniem. U listapadzie jana była vymušana źjechać ź Biełarusi paśla taho, jak joj pačali cikavicca śledčyja orhany.
«Pieršym krokam da majoj aktyŭnaj pazicyi stała situacyja z karanavirusam u krainie, zamoŭčvańnie taho, što adbyvałasia, — tłumačyć Darja Čechava. — Tryhieram stała toje, što ŭ mianie była pacyjentka, jakaja, na žal, pamierła praz karanavirus. I zdaryłasia heta tady, kali ŭ Biełarusi jašče nielha było pamirać praz karanavirusnuju infiekcyju. I toje, što heta ŭsimi sposabami chavałasia, uźniała ŭva mnie chvalu abureńnia. I paśla, kali pačałasia pieradvybarčaja kampanija i, samaje asnoŭnaje, pieršyja try dni paśla vybaraŭ, kali adbyvalisia žorstkija zatrymańni, kali my stali śviedkami źbićciaŭ, katavańniaŭ, hvałtu, to naturalna, što mnie jak doktaru było składana zastacca ŭbaku. Ja imknułasia aśviatlać heta, bo maŭčać pra takoje nielha».
Na hety momant Darja znachodzicca za miažoj. Jana kaža, što adjezd byŭ vymušany, jana jaho nie płanavała i nie chacieła. Nika Siachovič, anestezijołah-reanimatołah, praciahvaje pracavać u Biełarusi.
«Pracavać zaraz vielmi składana. Składana ŭ tym płanie, što, aproč infiekcyi, pandemii, nikudy nie dzielisia spadarožnyja zachvorvańni, traŭmy i inšaje. I dapamohu akazvać treba, — kaža Nika. — Stacyjanary šalona zahružanyja pracaj ź infikavanymi kavidam pacyjentami. Adpaviedna, inšuju dapamohu akazać składana. Znajści niedzie miesca, zdarovaha doktara, svabodnyja ruki, jakija b tabie dapamahli, — heta vielmi składana. Składana i miedykam, i pacyjentam. I mnie ščyra škada prosta ŭsich».
Kali ŭ pieršuju chvalu i Darja, i Nika pracavali niepasredna z pacyjentami z karanavirusam, to ŭ druhuju abiedźvie nazirajuć za situacyjaj trošku zboku.
«U hetuju chvalu karanavirusa ja śviadoma nie pajšła ŭ pieraprafilavanyja adździaleńni, ale tym nie mienš ja ŭsio adno sutykajusia ź imi kožny dzień, bo chvoryja traplajuć u luboje adździaleńnie. Paśla my ich imkniomsia pieravodzić u vyznačanyja. Ale, pakolki tam miescy zakančvajucca, ludzi zaraz lažać i ŭ adnosna čystych adździaleńniach, — tłumačyć situacyju Nika. — Čamu ja nie pajšła. Nie pajšła, bo było vielmi składana. Ja adčuła ŭvieś bol arhanizacyi. Kali ŭsio arhanizoŭvajecca tak-siak nakasiak, mnie, jak empatyčnamu čałavieku, vielmi škada i baluča hladzieć na toje, što my b mahli štości zrabić, ale akazvajemsia ŭ situacyi, kali ničoha zrabić nie možam. Ja vyrašyła pabierahčy siabie i pastaracca zrabić usio, što mahu, u čystym adździaleńni».
