«U Minskim rajonie piaciora mužčyn paškodzili aŭto žonki milicyjaniera», — paviedamiła milicyja 29 vieraśnia. Apublikavali i videasiužet: mužčyny pakinuli svaje mašyny ŭ lesie, pryjšli piechatoj da doma milicyjaniera. Toje aŭto ablili farbaj, pazalivali dźviery mantažnaj pienaj, prabili koły.
Usich mužčyn žorstka zatrymali. Milicyja vykłała videa, dzie adzin z zatrymanych pryznajecca, što «pamyliŭsia palityčnymi pohladami». Na videa — dziciačy trenier Anton Bykoŭski (padrabiaźniej pra jaho čytajcie tut).
4 śniežnia Śledčy kamitet paviedamiŭ, što rasśledavańnie pa spravie skončyli. Usich fihurantaŭ vinavaciać u złosnym chulihanstvie, jakoje ździejśniła hrupa asob. Pakarańnie — da 6 hadoŭ.
Akramia taho, niekatorym fihurantam dadali i inšyja abvinavačvańni.
«Vyznačana, što 28-hadovy žychar Minskaha rajona zbyŭ 30-hadovamu minčaninu teleskapičnuju mietaličnuju dubinku. Pavodle zaklučeńnia ekśpierta, hety pradmiet źjaŭlajecca chałodnaj zbrojaj udarna-razdrabniajučaha dziejańnia, — paviedamlajuć śledčyja.
Adpaviedna, 28-hadovaha mužčynu vinavaciać u zbycie chałodnaj zbroi — heta da 2 hadoŭ kałonii.
31-hadovaha mužčynu — u vyrabie i zachoŭvańni pradmietaŭ, «dziejańnie jakich zasnavana na vykarystańni haručych rečyvaŭ». Praściej kažučy, u jaho kanfiskavali anałah kaktejlu Mołatava. Heta taksama karajecca terminam da 2 hadoŭ.
Nu a ŭ Antona Bykoŭskaha śledčyja znajšli narkotyki.
«Doma ŭ 39-hadovaha žychara Minskaha rajona było kanfiskavana marychuana. Tam ža vyjaŭleny kanopli ŭ harščočku, a taksama śpiecyjalnaje abstalavańnie dla ich vyroščvańnia — lampy, vientylatary», — paviedamiŭ SK.
Ciapier Bykoŭskaha vinavaciać jašče ŭ zachoŭvańni narkotykaŭ biez mety prodažu (da 5 hadoŭ kałonii) i ŭ vyroščvańni raślin, jakija ŭtrymlivajuć narkatyčnaje rečyva hrupaj asob ci tym, chto raniej ździejśniŭ takoje ž złačynstva (heta ŭžo da 7 hadoŭ).
Žonka Antona Bykoŭskaha kaža, što nie viedała ni pra jakija narkatyčnyja rečyvy.
«Uvohule apošni miesiac pierad zatrymańniem my z Antonam žyli paasobku — byŭ kryzis u stasunkach. Tamu ja ničoha nie viedaju. Kali pry pieratrusie štości znajšli, ja była ŭ inšym pakoi i nie bačyła, što tam. U pratakole było napisana prosta «rečyva raślinnaha pachodžańnia», — kaža Darja.
Anton i Darja
Bykoŭski, jak i inšyja fihuranty, zastajecca pad vartaj. Materyjały spravy pieradali prakuroru dla nakiravańnia ŭ sud.
