Akramia asnoŭnaj pracy ŭ RNPC, doktar Ajzatulin zajmajecca ź niedanošanymi niemaŭlatami, dziećmi z redkimi spadčynnymi nejramyšačnymi zachvorvańniami, pracuje nad stvareńniem bazy takich pacyjentaŭ, piša Radyjo Svaboda.
Rustamu Ajzatulinu z 1 studzienia nie praciahnuli kantrakt u RNPC traŭmatalohii i artapedyi. Pryčym kiraŭnictva RNPC ź im nie sustrakałasia, supracoŭnica adździełu kadraŭ pryniesła papierku, jakuju prapanavała padpisać, raskazaŭ Svabodzie Rustam Ajzatulin.
«Spačatku vynieśli papiaredžańnie za pasty ŭ fejsbuku»
«U žniŭni ŭ mianie było šmat pastoŭ u fejsbuku. Mianie vyklikali ŭ Minzdaroŭja na razmovu i vynieśli papiaredžańnie za pasty ŭ fejsbuku. Nijakich zatrymańniaŭ mianie padčas akcyj nikoli nie było. Tolki pasty ŭ fejsbuku. Ciapier dačakalisia skančeńnia kantraktu.
Mnie skazali, što finansavańnie Minzdaroŭja na nastupny hod skaračajecca, supracoŭnikaŭ chapaje, tamu prosta nie praciahvajuć kantrakt. I dali padpisać papieru, što ja pracuju da 31 śniežnia. Nijakich razmoŭ, tłumačeńniaŭ nie było.
Ja napisaŭ słužbovuju zapisku kiraŭnictvu — adkazu nie atrymaŭ. Zadavać pytańni kiraŭnictvu i Minzdaroŭja całkam biessensoŭna — atrymajem adpiski.
Chadzić, uprošvać nikoha nie chaču, budu zvalniacca», — raskazaŭ Rustam Rustamavič.
Doktar Ajzatulin pracuje ŭ RNPC z 2008 hodu. Pryjšoŭ siudy ŭ kliničnuju ardynaturu paśla Mienskaha dziaržaŭnaha medyčnaha ŭniversytetu, tut i zastaŭsia pracavać. Asnoŭnyja navukovyja i praktyčnyja intaresy — traŭmatalohija i artapedyja: osteasintez pierałomaŭ kostak škileta ŭ dziaciej i darosłych; karekcyja vosievych defarmacyj nižnich kaniečnaściaŭ (časovaje blakavańnie zon rostu, vykarystańnie aparataŭ źniešniaj fiksacyi); kanservatyŭnaje i aperatyŭnaje lačeńnie kasałapaści i jaje recydyvaŭ, defarmacyj stapy dy inšyja.
Apiakujecca niedanošanymi dzietkami, pacyjentami z redkimi hienetyčnymi chvarobami
Rustam Ajzatulin taksama źjaŭlajecca kansultantam u Respublikanskim hramadzkim abjadnańni baćkoŭ niedanošanych dziaciej «RANO»; u dabračynnym hramadzkim abjadnańni «Hienom», u hramadzkim abjadnańni ludziej ź niedaskanałym osteahienezam «Krochkaje pobač»; pastajanna kansultuje pacyjentaŭ dziciačaha chośpisu.
«Heta moj asabisty intares. Mnie padabajucca hetyja dzietki. Nijakaj finansavaj zacikaŭlenaści tut niama, bo hetyja baćki, u jakich niedanošanyja dzietki, dzietki sa SMA dy inšymi redkimi chvarobami, i tak niaščasnyja.
U mianie mienavita navukovy intares i nadzieja na toje, što kali-niebudź i ŭ nas pačniecca surjoznaja praca, źjaviacca napracoŭki pa akazańni dapamohi takim dzietkam — kab byli pratakoły lačeńnia, dyjahnostyki, meddapamohi, jak va ŭsich cyvilizavanych krainach.
Baza vialikaja dla prasoŭvańnia hetaha nakirunku ŭžo jość, dzietki ŭsie abśledavanyja, zdymki paroblenyja, patreba ŭ artapedyčnych aperacyjach jość.
My pracujem razam z RNPC «Maci i dzicia, z reanimatolaham-neanatolaham Andrejem Vituškam pierasiakajemsia pa zonie intaresaŭ», — kaža Rustam Ajzatulin.
Darja Caryk, namieśnica dyrektara pacyjenckaj arhanizacyi «Hienom», jakaja dapamahaje dzietkam sa SMA, piša na svajoj staroncy ŭ fejsbuku:
«Nu jak ža tak? Adziny specyjalist u Biełarusi, chto stolki ŭkłaŭ u vyvučeńnie temy «artapedyja dzietak sa spadčynnymi nejramyšačnymi zachvorvańniami», adziny, da kaho nakiroŭvali ŭsich i zaŭsiody i biez kaho składana (niemahčyma) pradstavić viadzieńnie SMA i chvaroby Diušena ŭ ramkach multydyscyplinarnaj kamandy. Dumaju, tut i Respublikanskaje hramadzkaje abjadnańnie baćkoŭ niedanošanych dziaciej RANO, «Ja RIETT» dałučacca.
Nu jak ža tak, a jak ža pacyjenty? Možna było b pytacca. Ale, viadoma ž, adkaz adzin, u hetaj i ŭsich inšych historyjach papularnych siońnia zvalnieńniaŭ: biada hetaja tolki dla pacyjentaŭ, a dziaržava vyrašaje i vyrašała inšyja zadačy».
«Nia viedaju pakul, dzie budu pracavać»
Pakul Rustam Ajzatulin jašče nia vyznačyŭsia: abo budzie šukać pracu ŭ Biełarusi, abo daviadziecca źjechać za miažu.
«Nia viedaju pakul, dzie budu pracavać. Što tyčycca pracaŭładkavańnia ŭ kamercyjnych centrach — tut taksama ŭsio moža być. Jak było z adnym doktaram, jaki zvolniŭsia z tak zvanaj «lečkamisii» i ŭładkavaŭsia ŭ kamercyjny medcentar «ŁODE», a praz paru dzion patelefanavali «źvierchu» i zahadali zvolnić. Ciapier jon šukaje mahčymaść źjechać», — razvažaje Rustam Ajzatulin.
Doktar nie vyklučaje, što daviadziecca šukać pracu za miažoj.
