Hieorhi Vasilenka padčas sudu 17 listapada.
Hamielčuka asudzili na dva hady abmiežavańnia voli z nakiravańniem va ŭstanovu adkrytaha typu pavodle artykuła «złosnaje chulihanstva» za toje, što jon padčas akcyi pratestu zamianiŭ na płoščy Lenina čyrvona-zialony ściah na bieł-čyrvona-bieły, paviedamlaje Svaboda.
26 listapada sudździa Centralnaha rajonu Siarhiej Sałoŭski pryznaŭ Hieorhija Vasilenku vinavatym u złosnym chulihanstvie i pakaraŭ abmiežavańniem voli («chimijaj») na dva hady.
Sud pastanaviŭ źniščyć «bieł-čyrvona-biełaje pałotnišča, jakoje nie ŭjaŭlaje kaštoŭnaści», a aficyjny čyrvona-zialony ściah addać u harvykankam.
16 žniŭnia na płoščy Lenina ŭ Homli prachodziła masavaja akcyja pratestu suprać falsyfikacyi vybaraŭ i milicejskaha hvałtu. Tady niekalki maładych ludziej (u tym liku i Hieorhi Vasilenka) spuścili z mačty kala pomnika Leninu čyrvona-zialony ściah i padniali bieł-čyrvona-bieły. Čyrvona-zialony ściah jany pakłali pobač. Nieŭzabavie jaho zabrali milicyjanty.
Na Hieorhija Vasilenku zaviali kryminalnuju spravu za apahańvańnie dziaržaŭnaj symboliki. Ale padčas śledztva jahonyja dziejańni pierakvalifikavali ŭ «złosnaje chulihanstva».
Advakatka nie pahadziłasia, što heta złosnaje chulihanstva, i prasiła svajho padabaronnaha pa hetym artykule apraŭdać.
Jana skazała, što bieł-čyrvona-bieły ściah nia jość niezarehistravanaj symbolikaj, jon dvojčy ŭ historyi Biełarusi byŭ dziaržaŭnym ściaham.
Taksama jana zaznačyła, što ŭ dziejańniach Vasilenki «niama cyničnaha składu, nie było hrubaha parušeńnia hramadzkaha paradku, a milicyja nie rabiła nijakich dziejańniaŭ, kab spynić mahčymaje parušeńnie zakanadaŭstva».
Milicyjanty na heta adkazali, što bačyli zamienu ściaha, dałažyli pra heta kiraŭnictvu, ale im zahadali «nia ŭmiešvacca, kab nie raspalvać abstanoŭku».
Prakuror prasiła pakarać Vasilenku abmiežavańniem voli na dva hady.
