Pałata pradstaŭnikoŭ Kanhresa ZŠA ŭchvaliła ŭ sieradu zakonaprajekt «Ab suvierenitecie, pravach čałavieka i demakratyi ŭ Biełarusi» (Belarus Democracy, Human Rights, and Sovereignty Act), jaki praduhledžvaje mahčymaje ŭviadzieńnie sankcyj suprać rasijskich i biełaruskich čynoŭnikaŭ Sajuznaj dziaržavy, jakija majuć dačynieńnie da represij, piša Tut.by.
Zakonaprajekt byŭ pradstaŭleny kanhresmenam Krysam Śmitam. Jon źjaŭlajecca adnym z aŭtaram aktaŭ ab demakratyi ŭ Biełarusi 2004, 2006 i 2011 hadoŭ.
Jak adznačajecca ŭ tłumačeńni da dakumienta, tym samym pašyrajucca «paŭnamoctvy prezidenta ZŠA pa ŭviadzieńni sankcyj» u suviazi z vybarami 2020 hoda ŭ Biełarusi.
«Prezident ZŠA moža ŭvieści vizavyja sankcyi suprać luboha zamiežnika, jaki źjaŭlajecca siabram Centralnaj vybarčaj kamisii Biełarusi ci ŭdzielničaŭ u manipulacyjach na vybarach, abo ŭ dačynieńni da ŭradavaj asoby, adkaznaj za pieraśled niezaležnych ŚMI, albo pradstaŭnika Sajuznaj dziaržavy, albo rasijskaha hramadzianina, jaki prymaŭ značny ŭdzieł u pieraśledzie ŚMI, parušeńni pravoŭ čałavieka datyčna palityčnych represij u Biełarusi», — havorycca ŭ tekście.
Akramia taho abnoŭleny «Akt ab demakratyi ŭ Biełarusi» źmiaščaje nastupnyja pałažeńni:
- pryznaje Kaardynacyjnuju radu zakonnym instytutam dla ŭdziełu ŭ dyjałohu ab mirnaj pieradačy ŭłady i nie pryznaje Alaksandra Łukašenku «zakonna abranym lidaram Biełarusi»;
- zaklikaje pravieści novyja prezidenckija i parłamienckija vybary ŭ svabodnaj i spraviadlivaj formie ŭ adpaviednaści sa standartami ABSIE;
- zaklikaje vyzvalić usich palityčnych źniavolenych biez usialakich papiarednich umoŭ;
- padtrymlivaje imknieńnie naroda Biełarusi da svabody vieravyznańnia;
- dazvalaje dapamohu ŭ prasoŭvańni demakratyi i hramadzianskaj supolnaści ŭ Biełarusi;
- zajaŭlaje, što ZŠA nie pryznajuć uklučeńnia Biełarusi ŭ Sajuznuju dziaržavu z Rasijaj;
- patrabuje ad Złučanych Štataŭ stratehii pa prasoŭvańni viaščańnia, svabody internetu i dostupu da infarmacyi;
- akazvaje padtrymku biełaruskim ŚMI i pradstaŭnikam IT-siektara.
Inicyjatyva pavinna taksama atrymać uchvaleńnie Sienata, tolki paśla hetaha jana trapić na podpis prezidentu ZŠA.
