Karparacyja Pfizer u sieradu zajaviła ab zaviaršeńni kliničnych vyprabavańniaŭ vakcyny ad karanavirusnaj infekcyi COVID-19, jakuju jana raspracavała sumiesna z BioNTech. U najbližejšyja dni Pfizer nakiruje ŭładam ZŠA i inšych krain zajaŭki ab rehistracyi vakcyny, piša «Radyjo Svaboda».
U paviedamleńni taksama adznačajecca, što pakazčyk efektyŭnaści vakcyny vyjaviŭsia jašče vyšejšym, čym aceńvałasia raniej — nie 90 adsotkaŭ, a 95.
Jak śćviardžajecca, z bolš jak 43 tysiač dobraachvotnikaŭ, jakija ŭdzielničali ŭ treciaj fazie kliničnych vyprabavańniaŭ, karanavirusam zarazilisia 170 čałaviek. Pry hetym tolki 8 z hetych ludziej była ŭviedziena vakcyna, a astatnija atrymali płaceba.
Pfizer taksama paviedamiła, što raspracavała dla vakcyny specyjalnyja kantejnery z suchim lodam (vakcynu rekamendujecca zachoŭvać pry temperatury, nie vyšejšaj za minus 70°C).
Kali vakcyna budzie zarehistravanaja ŭ ZŠA, pakul nieviadoma. Jaje rehistracyja budzie aznačać, što moža być raspačataja kampanija masavaj vakcynacyi ad karanavirusnaj infekcyi, jakaja, na dumku mnohich specyjalistaŭ, moža pakłaści kaniec pandemii.
Raniej paviedamlałasia pra vysokuju efektyŭnaść jašče adnoj vakcyny, jakaja raspracoŭvajecca amerykanskaj kampanijaj Moderna, — 94,5 pracenta. Rasiejski instytut imia Hamalei, u svaju čarhu, paviedamiŭ, što jaho vakcyna Sputnik V demanstruje 92-pracentnuju efektyŭnaść. Pry hetym rasiejskaja vakcyna ŭžo zarehistravanaja, choć treciaja faza jaje kliničnych vyprabavańniaŭ jašče nie zavieršanaja.
