10 listapada sudździa Lidzija Cialica prysudziła našaj reparciorcy Kaciarynie Karpickaj 15 sutak aryštu. Sud ciahnuŭsia ažno try z pałovaj hadziny, dźvie ź jakich Cialica «abdumvała», jaki vynieści prysud. Kaciarynu schapili ŭ subotu, 7 listapada, padčas žanočaha maršu. Voś užo bolš za troje sutak jana za kratami. My vielmi čakajem jaje na voli! A pakul — raskazvajem pra Kaciarynu.
Kacia — z Mahiloŭščyny, ź nievialikaha horada Horki na 35 tysiač čałaviek. Horak dla jaje tvorčaj dziejnaj natury było mała, tamu paśla adpracoŭki raźmierkavańnia z žurfaka ŭ łakalnym dziaržaŭnym vydańni «Horacki vieśnik» jana viarnułasia ŭ stalicu.
Dva hady ŭ dziaržaŭnym ŚMI, dzie kožnaje słova vyčytvałasia strohimi cenzarami, Kaciu nie zrabili mienš svabodalubivaj. Nie źmienšyła heta i jaje žadańnie zmahacca za spraviadlivaść i abaraniać tych, kamu patrebnaja abarona. Dalejšymi etapami ŭ jaje žurnalisckaj karjery byli «Naša Niva» i Tut.by.
Kaciu ŭžo zatrymlivali na žanočym maršy — 26 vieraśnia. Ale tady adpuścili. Fota TUT.BY
Siła Kaci va ŭmieńni pahłyblacca ŭ historyi ludziej, a taksama fiksavać padziei, žyva pieradavać nastroj, atmaśfieru, bačyć cikavyja detali. Heta robić jaje repartažy admietnymi, a styl — paznavalnym.
Volny ad žurnalistyki čas Kacia pryśviačaje sportu i teatru. I apošniaje — nie tolki pra pachody na śpiektakli, jana sama ŭdzielničaje ŭ pastanoŭkach. A niadaŭna Kacia zapisała kavier na «Pieriemien» Coja pa-biełarusku — biełaruskaja mova dla jaje maje asablivaje značeńnie.
Kacia nikoli nie zastavałasia ŭ baku ad padziej u krainie. Sioleta, kali pačałasia vybarčaja kampanija, jana adpraviłasia pa kvaterach źbirać podpisy za vyłučeńnie ŭ kandydaty Viktara Babaryki. Voś tut možacie pačytać jaje šykoŭny dziońnik pra heta.
U časie paślavybarčych pratestaŭ Kacia pracavała jak reparciorka ŭ poli. Vy mahli bačyć jaje i na žanočych maršach, i na niadzielnych, i na dvarovych viečarynach. A jaje materyjały — na sajcie i ŭ telehram-kanale «Našaj Nivy».
Darečy, Kacia — adna sa stvaralnic prajekta «Naša Nina». Jana zaŭsiody viedała, što žančyny — moc. I chacieła, kab hałasy biełarusak hučali macniej.
Jość peŭny simvalizm, što zatrymali jaje mienavita na žanočym maršy. Ale my dakładna viedajem, što z hetym vyprabavańniem jana spravicca, bo inačaj heta nie była b naša Kacia.
