Palitołah Arciom Šrajbman u prajekcie «Žyćcio-malina» Mikity Miełkaziorava prakamientavaŭ padziei apošnich miesiacaŭ u krainie.
— Kali ŭsio skončycca?
— U takim režymie, jak ciapier, nie baču, jak heta moža doŭžycca bolš za hod. Čysta emacyjna. I kamuści heta zdasca: ničoha sabie, jašče hod heta ciarpieć! Ale davajcie pahladzim na bolšaj dystancyi taho, što było ŭ mai ci krasaviku. Kali b tady skazali, što Łukašenku zastałosia va ŭładzie maksimum hod-dva, to ŭsie b, napeŭna, ździvilisia, maŭlaŭ, jon moža kiravać, kolki choča. Hetyja padziei, navat kali jany nie pryviaduć da nieadkładnaj źmieny ŭłady, skaracili termin isnavańnia hetaj ułady ŭ razy. Biez hetaha kryzisu, u pryncypie, mała, što pieraškadžała dasiadzieć Łukašenku da 2025 hoda, a potym spakojna sabie zładzić tranzit pa kazachstanskim scenary. Ale zdaryŭsia kryzis, i heta skaraciła pieryjad našych pakut.
— Kali b da vybaraŭ dapuścili Cichanoŭskaha, Capkału, Babaryku, to jak dumaješ, chto b vyjhraŭ?
— Babaryka. Heta było bačna pa apytańniach, jakija pravodzilisia na roznych sajtach. Capkała i Babaryka kankurujuć za adnaho vybarščyka, ale Babaryka charyzmatyčny, i tamu, chutčej, jon. Cichanoŭski? Ja dumaju, što ŭ jaho jość niedaacenieny elektarat. U pieršuju čarhu heta rasčaravany elektarat Łukašenki. Ale, dumaju, što mienavita tamu, što jon šmat kamu b nahadvaŭ Łukašenku pa styli, a nie pa idejach — heta b adšturchnuła častku ludziej, jakija ŭ vakuumie za jaho prahałasavali.
— Babaryka — heta prajekt Rasii?
— U hetaha niama surjoznych dokazaŭ. Hetaja viersija całkam ihnaruje svabodu čałavieka prymać aŭtanomnyja rašeńni. Heta značyć, my ličym, što da hetaha Babaryka 6 hadoŭ finansavaŭ biełaruskija inicyjatyvy, tvorčaść — i heta ŭsio było častkaj płana. Ničoha z hetaha jon nie rabiŭ sam. Heta ŭsio było častkaj niejkaj manipulacyi, padrychtoŭkaj. Heta značyć, my poŭnaściu admaŭlajem u čałavieka subjektnaść. Heta analityčnaja pamyłka, što niechta, uklučajučy Rasiju, moža arhanizavać i prakrucić takuju kambinacyju. Ničoha ŭ im, u jaho bekhraŭndzie nie vydaje prarasijskaści. Byli vypadki absurdnyja, kali na jaho ŭ «Hazpram» skardzilisia ruskija nacyjanalisty, što jon, had taki, na hrošy «Hazprama» padtrymlivaje biełaruskich nacyjanalistaŭ. Byli vypadki, kali za jaho intervju, za paraŭnańni niejkaha lićvinskaha duchu ŭ Biełarusi i tatara-manholskaha duchu na Uschodzie, jamu prylatała ad niaŭdziačnaj publiki ŭ Biełarusi i Rasii za nibyta rasizm. Heta nie čałaviek, u jakoha ruski śviet u hałavie. Ja liču, što pry prezidencie Babaryku Rasii było b praściej damaŭlacca ź Biełaruśsiu, ale heta nie značyć, što hety čałaviek zdaŭ by Biełaruś. Hetaha ja za im nie baču.
— Čamu Kačanava stolki vyrašaje?
— Kačanava Łukašenka abahaŭlaje. Jana lubić jaho biezzapavietna, ja nie kažu jak mužčynu, a ŭ płanie jak palityka. Jana ličyć jaho hienijalnym lidaram. Jon lubić takoje staŭleńnie da siabie. Jana, mabyć, pakazała siabie efiektyŭnym arhanizataram, tamu jana, navat budučy kiraŭnikom Savieta Respubliki (a heta, uvohule, dekaratyŭnaja rola ŭ siońniašniaj Biełarusi), jaje pradoŭžyli pryciahvać da niejkich kryzisnych situacyj. Ciapier, mnie zdajecca, jaje rola pajšła na spad. Łukašenka padabajecca taki padychod da siabie, kali jamu hladziać u rot, ź im zhadžajucca, kivajuć. Nie viedaju, mahčyma, heta ŭzrostavaje, a moža, palityčnaja stylistyka takaja. Ale čałavieku nie padabajucca tyja, chto ź im spračajecca.
— Cichanoŭskaja zmoža viarnucca da svaich katlet?
— Ja bajusia za šlub Cichanoŭskich. Tamu što kali Siarhiej vyjdzie z tymi samymi mača-paternami pavodzin: ja hałoŭny, ja haspadar, takija patryjarchalnyja ŭstanoŭki, a nasuprać jaho siadzić čałaviek, jakoha paŭkrainy ličyć abranym prezidentam, jana sustrakałasia ź Mierkiel i Makronam, jakaja na frazu «Śvieta, nie adśviečvaj» (jon skazaŭ heta joj praz telefon na adnym sa strymaŭ) moža i na miesca pastavić, ja dumaju, što heta budzie surjoznaja pierabudova dla Siarhieja ŭžo dakładna. Tak što ja pieražyvaju za hety šlub, kali ščyra. Ale katlety? Ja dumaju, što jana z zadavalnieńniem vierniecca da katlet. Tamu što katlety i ŭ cełym kulinaryja — heta nie prykmieta niejki žanočaj słabaści. Ja nie staŭlusia da hetaha tak. Jość mocnyja žančyny: samastojnyja, niezaležnyja — i jany lubiać hatavać.
