Dva dni ŭ žodzinskim haradskim sudzie razhladali spravu suprać 75-hadovaj Iraidy Misko pa faktach jaje ŭdziełu ŭ akcyjach pratestu, paviedamlaje Ex-Press.by.
Iraida Misko. Fota Marata Biełaha, Ex-Press.by
75-hadovaja žycharka Žodzina Iraida Misko, kandydat sielskahaspadarčych navuk, jakaja bolš za 40 hadoŭ zajmałasia navukaj u NDI ziemlarobstva i raślinavodstva NAN Biełarusi, paśla prezidenckich vybaraŭ 9 žniŭnia vychodzić z nacyjanalnym ściaham, tym samym vykazvajučy svaju hramadzianskuju pazicyju.
Suprać Iraidy Vasiljeŭny śviedčyli supracoŭniki adździaleńnia achovy hramadskaha pravaparadku lejtenant Jaŭhien Vajniłovič, namieśnik načalnika hetaha adździaleńnia kapitan milicyi Zoja Kukuškina, načalnik inśpiekcyi pa spravach niepaŭnaletnich major Dźmitryj Krakaŭski, kapitan milicyi Jaŭhien Siamaška, a taksama ŭčastkovy Alaksandr Popčyn.
Sudu pradstavili fota i videa z vyjavaj Iraidy Misko. Na adnoj z fatahrafij, pradstaŭlenaj milicyjanierami, Iraida Vasiljeŭna trymaje ŭ ruce paściłu bieł-čyrvona-biełaha koleru. «Tak, heta tak jana vykazvaje pratest. Ziefirkaj», — paviedamiŭ sudu kapitan milicyi Jaŭhien Siamaška.
Štraf 20 bazavych vieličyń (540 rubloŭ) — takoje pakarańnie Iraidzie Vasiljeŭnie Misko vyznačyŭ sud.
