ANT
Pasoł Rasii Dźmitry Mieziencaŭ byŭ hościem prahramy «Ničoha asabistaha» Marata Markava na ANT. Jon skazaŭ, što staronka pratestaŭ u Biełarusi «budzie pierahornuta», što treba pryniać praciahnutuju ŭładaj ruku, i ździviŭsia, niaŭžo biełarusy chočuć, jak u Bałtyi, adznačaje Radyjo Svabody.
Masavyja pratesty skiravanyja suprać «sajuznaj dziaržavy»
«Padtrymka [Rasiejaj] Biełarusi i 9,5-miljonnaha narodu — u ekanamičnym planie, u humanitarnym, u sajuźnickim, harantujučy biaśpieku źniešnich miežaŭ, a značyć i ŭnutranaha žyćcia… Tamu što siońnia razhojdvańnie — heta ŭ tym liku sproba ŭzłomu biaśpieki, u tym liku antyterarystyčnaj biaśpieki, adzinaj «sajuznaj dziaržavy»», — cytuje vystup Mieziencava BiełaPAN.
Pra pratesty: «Hetaja staronka budzie pierahornuta»
Što da pratestaŭ, jakija praciahvajucca štodzień amal try miesiacy, Mieziencaŭ zajaviŭ, što «vychodziać ža nia ŭsie pensijanery, nia ŭsie studenty».
«Važna siońnia, kab hety składany peryjad, hetaja staronka najnoŭšaj historyi była pierahornuta. Kažu nia jak čałaviek na pasadzie ŭ Ministerstvie zamiežnych spraŭ, a jak čałaviek, jaki supieražyvaje, ščyra chvalujecca za toje, kab u hetaj blizkaj dla nas, rodnaj dla nas Biełarusi było spakojnaje mirnaje žyćcio. Voś hetaja staronka budzie pierahornuta».
Pra kanstytucyjnuju reformu
«Važna, kab ludzi pahladzieli na tyja prapanovy, jakija daje siońnia ŭłada, kab ich adkaz na hety zapyt, na praciahnutuju ruku byŭ ščyry i zacikaŭleny, bo histaryčnaja faza nahetulki važnaja i adkaznaja, što dva baki, i navat tyja, chto chadziŭ na mitynhi, mohuć šmat čaho zrabić dla svajoj krainy».
Mieziencaŭ pryhadaŭ pra masavyja pratesty i trahičnyja padziei 1991 hodu ŭ krainach Bałtyi i šturm Viarchoŭnaha Savieta Rasiei ŭ 1993 hodzie, nazvaŭ ich «vializarnaj płataj za spakoj i svabodu».
«Dyk čamu ž siońnia niekatoryja biełarusy staviać pad sumnieŭ tyja vydatki dziela spakoju i svabody ciapierašniaj i chočuć viarnucca da tych vielmi niestabilnych časoŭ, perspektyva jakich absalutna nie vidavočnaja?» — skazaŭ Mieziencaŭ.
«Tanki NATO nacelenyja na Biełaruś»
«Siońnia tanki NATO nacelenyja na Biełaruś, «sajuznuju dziaržavu», kala najbližejšaj miažy Biełarusi. Siońnia ŭ bałtyjskich dziaržavach, — kudy my, leninhradzkija chłopcy, jeździli z zadavalnieńniem u vychodnyja, u kanikuły, sustrakalisia z našymi adnahodkami, chto z nami vučyŭsia z prybałtyjskich respublik, — my bačym kantynhient vojskaŭ NATO. Padstupnaje (mała prykładaŭ takoha biazbožnaha hrebavańnia svaim słovam) rašeńnie vysoŭvać tanki NATO da miežaŭ Rasiei».
